WILLEMSTAD.- Tin bastante reklamo di siudadanonan ku tur dia tin ku biba bou di pániko ora ku nan sali nan kas, pa motibu ku na tin ku tene kuenta ku kachónan peligroso ku ta kana riba kaya.
Durante lunanan anterior a surgi algun insidente kaminda kachónan a morde peatonnan entre nan un dama di edat.
Algun dia pasá Rancho Herberg a sufri un masakre kual un kantidat di bestia den e rancho a wòrdu morde i matá pa algun kachó ku a logra penetrá den e rancho kousando un desaster total.
Ayera HIT-team di polis a konfiská dos kachó peligroso riba òrdu di fiskal di Ministerio Públiko.
Motibu di esaki ta un insidente ku a tuma lugá resientemente na Koredor.
Durante e insidente aki, e dos kachónan a morde un kachó mas chikí mata ku tabata kana keiru ku su doño.
Mes ora e doño ku a bira víktima, a hasi denunsia di e echo aki. Doñonan di e dos kachónan ku a keda konfiská lo wòrdu interogá dor di polis. Aparentemente nan lo a hasi nan mes kulpabel di no a kumpli sufisiente ku protekshon di un animal peligroso ku ta den nan kuido.
Esaki ta kastigabel bou di artíkulo 3:2 den Kódigo Penal di Kòrsou.
En prinsipio insidentenan di mordementu semper por kondusí na konfiskashon di e kachó.
Riba òrdu di hues, hopi biaha e kachónan ta wòrdu sakrifiká .
Pa e motibu aki Ministerio Públiko ta atvertí ku ta hopi importante pa kada doño di kachó na Kòrsou pèrkurá ku e kachó no forma un peliger. Ta importante pa tene nan bon será den kura i tene e kachónan na liña i un bosá ora ta bai ku nan riba kaya.