WILLEMSTAD.- Ministerio Públiko (OM) ta anunsiá ku lo bai yama tur esnan ku tin un but relashoná ku faltamentu di reglanan di COVID-19. OM ta indiká ku nan lo bai aserka telefónikamente tur persona ku a risibí un prosèsverbal pa motibu di inkumplimentu ku medidanan relashoná ku COVID-19, i ofresé nan un transakshon. Si no paga e transakshon, e persona lo risibí un dagfar i lo mester presentá den korte.
E suma di e transakshon ku mester paga despues di a presentá dilanti hues, mayoria biaha ta mas haltu ku e transakshon ku a wòrdu ofresé.
Violashon intenshonal di medida di Corona ta un delitu. Si keda sentensiá pa esaki lo e bai riba e karchi di kastigu. Pago di e transakshon por evitá esaki.
Na mes momentu OM ta anunsiá ku su ofisinanan lo ta sera pa públiko.
Siguiendo e medidanan anunsiá dor di gobièrnu relashoná ku COVID-19, Ministerio Públiko (OM) lo ta será pa públiko te un próksimo aviso for di awe djárason 24 di mart 2021. Esaki ta konta pa tur edifisio di OM, tantu esun di De Tempel na Hendrikplein z/n, komo Parkèt di Prokurador General na Wilhelminaplein i Paga bo But na Abraham Chumaceiro Boulevard na Waaigat. Komunikashon telefóniko lo ta limitá durante e temporada aki. OM ta pidi pa tene kuenta ku esaki.
Ministerio Públiko lo keda monitòr e situashon pa si eventualmente mester tuma otro medida den kuadro di bienestar di tur trahadó i bishitante.