Eks hefe di Panamericano ta keda para riba su inosensia

WILLEMSTAD.- Ayera Hof a trata kaso di e hòmber Andrew Oseana (40) ku a keda kondená den korte di promé instansia na 30 aña pa dòbel i intento di asesinato. Tambe el a keda kondená pa poseshon di arma kandela. Ta trata di e kaso ku a tuma lugá na Souax dia 23 di mei 2018.

Segun e akusashon t’asina ku Oseana  a yega basha bala ku un shotgun na e sitio, kual e víktimanan C. Molina i J. Pedro a pèrdè nan bida na edat di 19 i 23 aña.

Shurrensly Thielman (26) tambe ta haña bala, pero a keda transportá pa Colombia pa tratamentu médiko,  debí ku e bala a okashoná problema  na su pulmon.

Thielman a sobrebibí e tiroteo i a regresá Kòrsou den mihó kondishon, pero a keda ku problemanan ku su salú i probablemente tin ku bai biba kuné.

El a hasi vários deklarashon na momento ku e tabata na Colombia i tambe despues ku el a regresá .

Mama di Thielman a deklará di a tende 4 tiru i ora el a sali pa bai wak, el a mira su yu hòmber bentá abou. Ora el a yega serka su yu, esaki a bis’é ku ta “ Boyo” a laga hende bin pa kaba kuné.

Despues e yu a bai fo’i dje i no a reakshoná mas. Oseana ku ta keda yamá “ Boyo” pa tur su konosínan, a ninga redondamente di ta involukrá den e kaso. Ayera tambe el a bisa mes kos.

El a bisa ku e ta inosente i no tin nada di aber ku e asesinatonan.

Durante tratamentu di e kaso, hues a sigui relatá ku na Colombia, Thielman a konta su ruman ku e tabata debe Boyo 700 florin di un arma di kandela ku el a kumpra serka dje.

Boyo a bin riba un djamars pa kobra su sèn, pero el a bisa Boyo ku e no tabatin e sèn i ku e por ward’é te djárason.

Riba e dia en kuestion, Boyo a bolbe presentá na momento ku e tabata sintá riba e stupi di su Barbershop.

El a bisa ku Boyo a yega i a puntr’é pa su sèn. Na momento ku el a bis’é ku ainda e no a keda kla, Boyo a bis’é ku e no tin koriente ni gasolin i ku el a kansa.

Aki el a mira kon Boyo a bai su outo, kue un arma di kandela i lòs bala riba dje. Ora ku e víktima Pedro a puntr’é dikon el a tira e hòmber, el a tira Pedro tambe, despues e otro víktima Molina.

Segun Thielman mas aleu, Boyo a kere sigur ku e lo a muri.

El a bisa di ta kere ku el a mata e dos otro gainan pa nan no ta testigu di loke e kier a hasi kuné. Thielman ayera a para komo testigu den e kaso. El a bisa di ta rekonosé Oseana komo esun ku a tir’é. Thielman tabata sintié hopi inkómodo.

El  a  bisa di a kumpra e arma serka Oseana paso e tabatin un Barbershop i tabatin miedu pa nan atrak’é. P’esei el a kumpra e arma pa defendé su kurpa. Segun Thielman ta trata di un revòlver chikí sin lachi bala.

Oseana a splika ku e dia ei el a bai pa kuminda Thielman, pero despues a kita bai promé ku e suseso. E ta bon amigu ku Thielman su ruman. E no sa nada di e tiroteo. Hues a bisa ku a haña rastro di polvo riba su karson  i tambe su djòki. El a bisa ku despues di a sali un training di tira, el a pone e arma mei mei di su pia i kisas esei a pone ku e rastronan a keda riba su karson.

Oseana tabata hefe na e kompania Panamericano i tabata duna instrukshon di tira.

Abogado general mr Angela a bisa entre otro ku tin sufisiente prueba kontra e akusado i vários deklarashon. Entre otro di Thielman ku a rekonosé komo esun ku a tira e i e otro víktimanan. Fiskal a haña ku Oseana a aktua ku sanger friu na momento ku el a bai ku un shotgun, dirigí riba e víktimanan i riba un distansia kòrtiku a kaba ku nan bida. Tur 3 a haña bala den pechu i un un di nan a haña bala den kabes. Mirando tur esakinan abogado general a bolbe pidi 30 aña pa Oseana meskos ku su kondena den korte di promé instansia. Dia  3 di desèmber Hof lo dikta sentensia.

https://extra.cw/e-di-8-i-9-asesinato-pa-ana-2018/