WILLEMSTAD.- Bosero di Ministerio Públiko Norman Serphos un ratu pasa a konfirmá un kaso di ladronisia hopi serio ku a tuma lugá den kompleho di polis na Rio Canario. Segun e bosero di OM, ta awe mainta a deskubrí ku a tuma lugá un robo grandi den kua deskonosínan a bai ku gran kantidat di droga for di e kompleho di polis na Rio Canario.

Landsrecherche a haña enkargo pa huntu ku Kuerpo Polisial Kòrsou hasi un investigashon. Na kabes di e investigashon aki tin un fiskal. Na mes momentu OM ta desmentí e notisia ku a hòrta droga, plaka i arma di kandela. OM su bosero ta indiká mas aleu ku e robo tabata di kokaina (red. Kokaina no ta droga mas?). Mas ta splika tambe ku ta deskonosínan a forsa 2 porta di heru pa logra drenta den e kompleho. EXTRA mester indiká ku kontrali na e informashon ku bosero di OM a emití den e kaso aki, ku ta awe mainta a deskubrí e robo, tin medionan di komunikashon ku for di ayera a informá ku bosero polisial a konfirmá e robo, pues e pregunta ta surgi kon por ta ku ta awe mainta ta bisa ku a deskubrí e robo. Di tur manera e investigashon ta kanando. Den edishon di EXTRA di mayan, tur sobra detaye.