WILLEMSTAD.- EXTRA a tuma nota di un informe riba retnan sosial den kua abogadonan Murray i De Roos & Pen, den un deklarashon konhunto, ta reakshoná riba informashon ku Ministerio Públiko lo ta bolbe entamá otro kaso penal kontra di dr. Emsley Tromp eks presidente di Banko Sentral di Kòrsou i Sint Maarten.

Den e informe e abogadonan ta bisa ku Tromp ta lamentá ku atrobe ta bini dilanti ku OM ke bai korte kuné, despues di kasi 2 aña ku Tromp a haña libertat den e kaso Saffier i a finalisá  persekushon den su kontra.

Korte superior no a duna kontesta ainda riba e apelashon ku Tromp a entregá kontra di e persekushon ku OM ke kuminsá atrobe. Esei ta motibu tambe dikon Tromp no ke bisa muchu kos den prensa.

Ministerio Públiko a konfirmá pa EXTRA ku ayera un opheshon a keda entregá na Korte di parti di e siudadanonan sr. T i sr. L segun artíkulo 293 SV. Ambos a entregá opheshon kontra di e ‘dagvaarding’ di OM. Bosero di OM Roderick Gouverneur a splika EXTRA ku ta trata di un investigashon ku ta karga e nòmber Hercules, ku ta enfoká riba echonan diferente for di esnan ku a keda persiguí den e kaso Saffier.

OM ta warda riba desishon di Korte pa asina wak si por trese e kasonan aki dilanti di Korte di Promé Instansia. Ora tin mas klaridat tokante di esaki OM lo duna mas informashon.