WILLEMSTAD - Ministerio Públiko a pidi kastigu haltu awe tardi kontra di kuater hòmber relashona ku e asesinato di Toon Brood, miembro di Koninklijke Marechaussee, ku a tuma lugá dia 31 di mei di e aña aki.

Kontra di e hòmber di 20 aña Amon Fraay, Ministerio Públiko a pidi un kastigu di 28 aña; kontra di Aivano Martina a pidi 20 aña; i kontra di Claverzjion Novento 18 aña di prisòn. Pa e shofùr Glennson Zimmerman, Ministerio Públiko a pidi un kastigu di 5 aña di prisòn.

Fraay a risibí e petishon mas haltu pasobra ta inkluí su ròl den e asesinato di Tahir Jansen di 25 aña, ku a tuma lugá den sèptèmber 2023. E asesinato ei a tuma lugá despues di un diskushon riba un parti di  ‘vape-pen’ hòrta ku tabata hasi falta. Esaki a wòrdu tratá den korte djaweps.

Fiskal De Graaf a referí na e dos kasonan komo ‘dos echo horibel di un kategoria eksepshonal’. El a deskribí Toon Brood komo ‘un persona ku tabatin solamente bon intenshon pa e isla’ i a pidi pa un kastigu haltu, no solamente komo kastigu, pero tambe pa protehá komunidat.