WILLEMSTAD.- Komishon sentral (kerncommissie) di lei di rekuperashon (herstelrecht) a tene un seshon di informashon tokante lei di rekuperashon i mediashon den kasonan penal na benefisio di Reclassering i Fundashon Ayudo na Víktima (Stichting Slachtofferhulp). E komishon ta konsistí di entre otro representantenan di Ministerio di Hustisia, Reclassering pa hóben (jeugdreclassering) i Ministerio Públiko (OM).

A papia i deliberá ku vários partner den e kadena hudisial tokante implementashon di e lei di rekuperashon. Esaki for di un bista komun tokante un sosiedat di rekuperashon i banda di kasonan penal i mediashon denter di e trayekto penal.

Rekuperashon entre kulpabel i víktima 

Lei di rekuperashon ta un proseso di mediashon komun den kual ta pone atenshon riba tuma responsabilidat ora a hasi daño na un víktima, den kua e persona aki ta pará sentral den e totalidat. Den e proseso aki ta papia tokante e impakto di e daño ku a keda kometé na e víktima. Tambe pa asumí responsabilidat pa rekuperashon entre e kulpabel, e víktima i esnan envolví.

Mediashon penal ta konsistí di vários forma di ‘mediation’ entre víktima i kulpabel ku e meta pa solushoná e konflikto ku a surgi. Por pensa riba entre otro pleitamentu pa hopi tempu entre bisiña ku por resultá den maltrato. Ta atendé ku e echo kastigabel, pero tambe e problema ku a surgi den kual e problema entre e bisiñanan por keda solushoná pa medio di mediashon.