WILLEMSTAD.-Den un informe minister di finansa Javier Silvania a anunsiá ku dia 6 di desèmber último el a duna instrukshon na Ontvanger pa hasi pagonan ku tin di haber ku restitushon di impuesto riba entrada (inkomstenbelasting) i primanan sosial (sociale premies), denter di 15 dia di trabou despues ku Inspectie der belastingen pone e aanslag.

Minister di Finansa ta bisa ku el a tuma nota di keho den komunidat ku ta durando demasiado largu promé ku Ontvanger hasi pago di e restitushonnan riba kuenta di banko di e siudadano.

Ku e instrukshon aki, Minister di Finansa ke tin un maneho transparente pa evitá ku ta solamente ora un persona tin un konosí na Ontvanger e ta haña su restitutie mas lihe. Esaki ta un derechi ku kada persona tin i tur hende mester haña un trato igual.

Minister di Finansa ta hasi un petishon na tur esnan ku tin derechi riba un restitushon, pa den kaso ku Ontvanger no tin e informashon aki ainda, duna e kuenta di banko na Ontvanger mas pronto ku ta posibel, di moda ku e proseso di restitushon por kana mas lihé.