ABVO: Privasidat ta na peliger

WILLEMSTAD.- Tin un potensial peliger pa privasidat di tur ámtenar. Na e konklushon aki sindikato ABVO ta yega despues ku miembronan ta reklamá enérgikamente ku servisio di impuesto a hasi uso di nan mail di trabou pa manda kobra impuesto atrasá.

E sindikato a manda un karta ku pregunta pa minister enkargá ku asuntunan di personal, Ornelio ‘Kid’ Martina (PNP). Tambe a pidi e minister un reunion pa asina haña splikashon di kiko ta pasando.

Miembro di direktiva di ABVO, Raymond Margaritha ta bisa ku ámtenarnan a risibí riba nan mail di trabou un mail di servisio di impuesto informando ku nan tin un debe habrí i ku nan mester pasa na ofisina di Landsontvanger pa drenta den un areglo di pago. E ámtenar mester trese su  2 último slep di salario, kopia di su 2 último “statement” di banko i un lista ku tur nan gastunan mensual.

Margaritha ta bisa ku e kos aki ta insólito i sumamente peligroso. “Un mail di trabou ta pa asuntunan di trabou. E ámtenar no mag usa e mail adrès aki pa su kosnan personal, pues kon por ta ku un departamento di gobièrnu si ta manda asuntu privá di e ámtenar riba su mail di trabou?”

E asuntu aki ta forma un peliger a e privasidat di e ámtenar, Margaritha ta sigui bisa pasobra e ta nifiká ku ta subi den e sistema di mail di gobièrnu pa buska punto di kontakto di e ámtenar. “Awe ta servisio di impuesto, mañan ta subi mail di trabou pa manda kobra kualke but òf duana por ehèmpel ta manda kobra kualke resibu ku un ámtenar por tin habrí via su mail di trabou.”

Segun Margaritha gobièrnu mester separá e kosnan for di otro, sino e por bira un problema grandi. “Si servisio di impuesto mester kobra un ámtenar algu, mester tuma kontakto kuné via su mail privá ku el a registrá na e servisio òf na su adrès di kas.”

Ta den e kuadro aki ABVO a manda puntra minister Martina si ta bèrdat ku ta usando mail di trabou pa kobra ámtenarnan impuesto atrasá, si e minister ta di akuerdo ku impuesto ta algu privá di un persona i si ta un sistema di proseder nobo gobièrnu a kuminsá kuné pasobra den e kaso ei mester informá trahadónan di esaki i splika ta kiko ta e intenshon tras di esaki. “ABVO ke sa si ta un maneho nobo tin òf si ta un desishon a kai den Konseho di Minister pa kuminsá usa mail di trabou pa asuntunan privá di e ámtenar.”

Segun Margaritha si esaki ta e sistema nobo ku gobièrnu ta bai atendé ku su empleadonan, tin hopi kos mas pa sosodé. Mester bini e plataforma di konsulta GOA ku e intenshon aki. Tambe mester pidi Konseho Sosial Ekonómiko (SER) un konseho riba e maneho nobo aki.

“Tambe mester bai habri LMA (Landsverordening Materieel Ambtenarenrecht”) ku ta e lei ku ta rigi tur derecho i obligashon di un ámtenar, pasobra e ámtenar tambe por kuminsá usa su mail di trabou pa atendé ku su kosnan privá.” Esaki sinembargo no mester ta e intenshon, segun Margaritha.