WILLEMSTAD.- Operashon Siman Santu e aña aki tambe lo konta ku kooperashon di diferente instansia; Entre nan Kuerpo polisial, GMN, MEO, Brantwer, CTB, Selikor, Politur, Kustwacht, Citro, FKAK, Rode Kruis, Janthiel Security.

Tur tabata presentá ayera durante di e rueda di prensa kaminda a bin dilanti meta di e operashon Siman Santu ku  ta limpiesa di playanan, kontròl i benta kuminda segun regla, seguridat di turista i esnan ku ta bishita playanan, redusí robo i atrako, fasilitá i intermediá pa nos piskadónan, órden públiko, aksesibilidat di playanan i palabrashon.

Gruponan di enfoke durante di e operashon di siman santu ta personanan ku ta bai kamper, esnan ku ta bai laman, turistanan, mayornan ku ta bai ku nan muchanan, personanan ku ta bai ku boto òf seadoo riba awa, sambuyadó i esnan ku ta bai snòrkel, piskadó, trafikantenan riba kaminda di Banda Bou en partikular i turistanan ku ta bishitá e lugánan di atrakshon manera shete boka  i Directeursbaai.

Sr. Ingiomar Balentien di ministerio desaroyo ekonómiko di su parti a trese dilanti ku nan di inspekshon i alabes e ministerio mes ta enfatisá ku nan ke pa tur persona ku ta hasi negoshi, por hasié sigur si e ta kontribuí na e persona mes i na desaroyo nos pais i ekonomia. Pa e hasimentu di negoshá bai di forma kontrolá, MEO ta hasi kontròl huntu ku e otro instansianan, basá riba leinan ekonómiko. Lo kontrolá pèrmit di negoshi; esei ta negoshi figo manera un tienda i kafe, restorant i panaderia i e ‘standplaats vergunning’, i tambe esnan ku ta hasi uso ‘vent vergunning’, ku ta duna servisio na pia òf vehíkulo.

Lo tin kontròl riba indikashon di preis i esei ta konta pa tur produkto. Tur servisio ku ta duna na kliente mester tin un indikashon di preis visibel i valuta i OB inkluí.

Pa loke ta propósito di negoshi  señor Balentien a splika ku ta algu masha importante sigur den e dianan benidero.  Ku esaki sr. Balentien a bisa ku tur hende sa ku e temporada aki ta unu kaminda hende ta bai laman pa disfrutá i p’esei tur negoshi mester kumpli ku e propósito ku tin den e pèrmit di e negoshi ei.

Orario di operashon tambe ta loke MEO ta enfatisá. Tur negoshi na Kòrsou tin orario di operashon di 6 or di mainta pa 12, ku eksepshon di standplaats ku por operá di 7 or mainta pa 7 or di anochi, esnan di anochi  manera trùk di pan ku tin pèrmit di 9 or di anochi te ku 6 or di mainta. Ta pidi tur propietario pa sigui kooperá, respetá otro i keda mantené na regla i leinan vigente pa tur por gosa i kontribuí ku desaroyo di ekonomia di nos pais.

Di parti di kuerpo polisial bosero sr. Maurits Rosalina tambe a papia riba e parti di seguridat i mantenshon di órden públiko.

Operashon siman santa ta unu kaminda tin fakansi di skol i hopi ta hasi uso di e oportunidat pa pasa tempu di kalidat ku famia i disfrutá di e siman aki. Ultimo tempu a ripará ku e parti Wèst  di Kòrsou en partikular tin aglomerashon di siudadanonan, ku ta akudí pa disfrutá di playanan, pero tambe ku ta skohe pa pasa tempu di kalidat ku nan famia na wikènthùis.

Mester sòru pa segun leinan di tráfiko garantisá seguridat den tráfiko.

Polis ta bai tin kontròlnan preventivo i huntu ku partnernan ku tu forma e operashon siman santu. Tambe segun sr. Rosalina nan lo asistí i suministrá informashon kaminda esaki ta nesesario, na turista i siudadanonan ku ta bishita e áreanan.

Pa loke ta kontròlnan e bosero polisial a bisa ku por ferwaktu esakinan sigur i komo tal sali kas ku tur papel i reibeweis na òrdu, pasobra por haña kontrolnan na diferente sitio, kaminda tin trafikashon di hende.

Tene kuenta ku uso di alkohòl ora ta manehá vehíkulo. Lo kontrolá tambe na sitionan ku sa ku tin kiebronan den vehíkulo i ladronisia di vehíkulo, den kas i den wikènthùisnan. Esakinan ta e tipo di kontròlnan ku por ferwaktu. Paga tinu unda ta stashoná vehíkulo  tambe pa no yega i topa esaki di klèm.

Ta sugirí pa no laga kosnan di balor visibel den vehíkulo. Ta hasi apelashon na komunidat pa tene nos mes na tur regla, pa komportá, pa disfrutá i asina tin un di fin siman kaminda kada hende ta skohe kon e ta pasa kalidat ku su famia.

Algun medida ku bosero polisial a menshoná ta entre otro na Playa Piskadó ku su entrada ta keda sera i tur hende por parker dilanti di misa di Wespen kaminda lo tin vigilansia pa outo. Tambe ta hasi apelashon pa no parker riba e ruta kantu di kaminda entre playa piskadó i rancho El Sobrino ya ku e kaya ta smal kaba i e por trese aksesibilidat di tráfiko den problema.