WILLEMSTAD - Den nos afan pa sigui partisipá i representá Pais Kòrsou na kompetensia nan internashonal tin ku anunsiá ku FDOK ku tur probabilidat lo partisipá ku un delegashon di deportistanan na e di XII Weganan Suramerikano ku lo tuma lugá di 1 pa 15 di òktober 2022 na Asunción na Paraguay. E Weganan Suramerikano ta inkluí 34 ramo deporte ku ta konsistí di 53 disiplina. Esaki lo ta e promé biaha ku pais Kòrsou lo partisipá bou di su propio Himno i Bandera na e Weganan Suramerikano. E Weganan aki ta wòrdu organisá pa e Organizacion Deportiva Suramericana (ODESUR).

Den e lucha pa rekonosimentu Olímpiko, a logra ku Pais Kòrsou a bira miembro asosiá di ODESUR. P’esei awor tin e oportunidat ku nos por partisipá na e weganan menshoná.

Kaminata

Den e kuadro pa rekoudá fondo pa por partisipá na e Weganan Suramerikano, FDOK lo organisá un kaminata.

E kaminata lo tuma lugá 7 di novèmber 2021. Ta hasi un petishon na pueblo di Kòrsou pa sostené e kousa aki en Grande dor di kumpra bo karchi i partisipá na e kaminata di FDOK 2021.

Informashon tokante e kaminata entre otro ki dia ta bende karchi, kuantu ta kosta, salida i tur eseinan lo sigui den prensa.