Tirzo Martha

Instituto Buena Bista

 

 

Oportunidat pa studia arte na Instituto Buena Bista

Instituto Buena Bista a keda funda na 2006 ku e meta pa krea un plataforma sólido pa arte i edukashon di arte. Tirzo Martha direktor na Instituto Buena Bista a konta di e posibilidatnan ku IBB ta ofresé pa nos hóbennan ku ke sigui studia den arte.

 

IBB 13 aña….

Instituto Buena Bista ta un  pre estudio sosial pa hóbennan ku ta bai den direkshon di estudio kreativo. IBB ta konsentrá mas riba arte visual i loke nan ta yama ‘Toegepaste kunst” kual ta diseño gráfiko, diseño di moda, video oudiovisual i hopi mas. Den pasado nan (Tirzo Martha i David Bade) tabata hasi hopi proyekto sosial kultural den bario i skolnan i asina a bin deskubrí ku tin hopi atento ta kana rònt, hóbennan ku kapasidat pa yega leu riba tereno di arte i kreatividat pero komo nan no tin guia nesesario pa drenta un akademia di arte, nan ta kai atras i ta kana rònt riba nos isla sin por bai e direkshon ku nan ke. Asina a yega na e idea pa bin un instituto ku ta duna e hóbennan aki un preparashon kaminda nan ta haña chèns pa desaroyá nan mes di tal forma ku no solamente por drenta un akademia di arte pero mas ku tur kos e chèns ku nan ta logra nan skol avansá ta bira muchu mas grandi. I p’esei segun Tirzo Martha, IBB ta sigui guia e hóbennan aki durante di nan estudio, te na e punto ku ora nan kaba skol i kuminsá nan karera profeshonal ta yuda nan tambe.

Prepará e hóben….

IBB ta prepará e hóbennan pa 2 aña, sigui guianan durante di nan estudio pasobra e estudionan kreativo no ta bai fásil manera hopi hende ta kere. Bo referensia mester keda tradusí den referensia na un pais straño i p’esei mester di e guia nesesario i pa por krea kondishonnan pa e hóben por haña su mes. Durante di e estudio e hóben ta haña guia pero tambe ora e terminá su estudio e ta haña guia pa asina e por drenta e proseso laboral i bira profeshonalnan.

 

No tabata fásil….

 

E kaminda den 13 aña di eksistensia di Instituto Buena Bista segun Tirzo Martha no tabata nada fásil. E mes komo artista ku ta biba i traha na Kòrsou konosé e kondishonnan kon difísil e ta na nivel ku bo ta hasi arte na e nivel aki. E ta algu otro ku e kos tradishonal ku hopi hende ta kere ku arte ta manera pinta kosnan kolorido, traha eskulturanan den forma di hende òf bestia i ku e arte aki ta bai muchu mas leu. Esei ta trese kuné ku bo ta den komunidat kaminda e referensianan i konosementu ta hopi limitá. E otro problema ta ku hopi biaha hende ta pensa ku arte bo no por gana bo pan i ta hòbi e ta. Tin mayor ta pensa ku e yu por studia arte si pero e tin di sòru na logra un otro estudio mas pa e haña trabou. E otro ku ta bin aserka ta ku nan ta kere ku ta bai ku ta trata aki di arte i kreatividat pero over di e responsabilidat pa un komunidat tambe i esei responsabilidat aki no solamente ta den aspekto kreativo pero kultural tambe, den aspekto di herensia, futuro, identidat. I na momentu ku bo ke hasi esaki tur funshoná bo mester sòru pa e kondishonnan tei pa desaroy’é.

 

 

Definí nos mes….

Si pensa ku den siman di kultura konosé solamente e trahe folklóriko i e konfó, ta nifiká ku tin 200 aña sin produsí algu ku nos por definí nos mes, definí nos identidat mara na otro kosnan ku no ta e kosnan ya menshoná, Esei ta un señal ku nos tin di bira mas konsiente i manda nos desaroyo kultural, kreativo mas leu ainda.

 

Kon drenta IBB…

Pa drenta e instituto di arte aki, Tirzo Martha a splika Djasabra ku mester hasi un “toelating” i esei ta laga wak kiko e hóben ta traha i ta papia ku e hóben pa wak nan motivashon i sa kiko nan ke hasi. Esei pasobra tin mucha ke hasi algu kreativo pero ta keda pensa ku e tin di hasi algu pa haña un trabou. E otro punto ku tambe ta trese konfushon ta ku e hóben ta kere ku hungando game esei ta nifiká ku nan por diseñá un game i hasi estudio di diseño di game. Pero e estudio ta algu kompletamente diferente. I esei ta trese desapunto kuné. Tambe ta bin aserka segun Tirzo Martha ku mayornan ta bisa ku e ke pa su yu ta hasi algu ku e ta haña un trabou. Arte segun Tirzo ta e esensia di loke ta biba den e hende ku e ke saka i ekspresá. I e forma ku ta sake ta den forma di un obra di arte, den un diseño, un pelíkula etc. Esei ta e kos di mas importante ku ta mustra ku nos ta humano, segun Tirzo.

 

Kaba ku Bachelor….

No ta asina ku e hóben mester tin Havo, VWO etc. pa e drenta. E realidat di Kòrsou ta ku hopi mucha na Kòrsou ta VSBO i hopi hóben ku nan ta haña ta dropouts i loke IBB ta hasi ta sòru di krea e struktura i kondishonnan pa e hóben por desaroyá su mes pa asina tòg por drenta e estudio. En prinsipio e akademianan di arte ta nivel HBO i e hóben lo mester tin Havo, pero tin sistemanan ku por hasi IQ tèst pa e hóben tòg por drenta. E bentaha di bai IBB ta segun Tirzo, ku nan tin bon kolaborashon ku akademianan di arte i nan sa ku e hóbennan di IBB tin e nivel nesesario. Nan tin kaso di hóbennan ku a kaba VSBO i asta dropouts ku a pasa fásil for di e estudio. I tin ku no a logra ni e ‘IQ test’ pero tòg a logra pasa i kaba ku bachelor den Fine Arts.

 

IBB ta guia e hóben te final….

Na IBB en prinsipio e hóben ta keda 3 aña pero e por keda te 3 pa 4 aña pasobra nan no ta sufisiente kla òf muchu hóben. I tin biaha e hóben mes ta skohe pa bai un aña mas i despues ta drenta institutonan na Ulanda pero tambe den region. Na Ulanda IBB mester ta intervení i yuda e hóbennan pa haña beka na SSC i den region tambe nan tin bon eksperensia ku hóbennan ku a bai studia por ehèmpel na Martinique. Relashoná ku e último ei, Tirzo a konta ku ounke Martinique ta franses, e hóben ku a kaba IBB i a bai studia einan, a hasi un kurso rápido di franses i a siña e kosnan básiko. I e hóben ei a terminá e estudio di arte na Martinique ku Cum Laude. E hóben aki a bin Kòrsou bèk i ta trahando na IBB.

 

Motivashon….

Hopi biaha hende ta lubidá ku bo kalidat di nivel di estudio ta mara na bo motivashon. Si bo no ta motivá, anto mihó lubidá. Bo por hal eksámennan nèt nèt.Pero si e motivashon ta bon ta logra mas. Loke IBB ta siña su studiantenan ku e no ta bai studia pa haña diploma i bon trabou i gana hopi sèn, pero e estudio ta pasobra e nesesidat urgensia ta esei bo ke pa hasi pa bo kompletá komo hende, pa desaroyo humano i ora ta konsiente di esei hopi ‘issue’ ku studiantenan por haña konfrontá kuné, pa nan no ta ‘issue’ mas.

 

Nada di supsidio di gobièrnu….

IBB no tin kolaborashon ku enseñansa na Kòrsou. Awor aki ta sierto dosentenan ku konosé nan

i ku sa di studiantenan ku talento ta manda serka nan di IBB. Tambe IBB tin kolaborashon ku algu identidat partikular ku ta mira e balor di IBB i ta sostené nan finansieramente. Algun aña pasá nan a haña Prins Bernhard Cultuur Fonds Preis i ku esei nan ta lora. Prins Bernhard ta sostené algun di e hóbennan pasobra tin di nan ku bo por paga. IBB ta kobra 3 mil florin pa aña ku ta inkluí materialnan tambe pero hóbennan hopi biaha no por paga. Tin empresanan ku tambe ta spònser hóbennan. IBB no ta haña supsidio di gobièrnu, ku sigur ta un lástima si mira ku tur supsidio di IBB ta bin di Ulanda. Danki na Reda Sosial nan ta haña sosten segun e por. Internashonal IBB ta haña hopi rekonosementu. Resientemente nan a gana un rekonosementu masha importante na Ulanda. E interes awor aki ta grandi pa loke IBB ta hasi na Kòrsou pa hasié na Ulanda tambe. IBB tin kolaborashon ku e Kunst Art na Rotterdam kaminda nan tin sala grandi den museo i ta hasi eksposishon i e mesun struktura na IBB nan tin einan ku 35 studiante einan. E último 3 aña a bai asina bon ku Ulanda ta deseá kontinuidat. Tur hende por mira e bashí ku IBB ta yena ta masha difísil pa e muchanan por pasa e estudio regular i drenta un HBO. Esei no na Kòrsou so pero na Ulanda tambe tin e mesun situashon.

Den kaso di e studiantenan di IBB, nan ta hasi un impreshon asina bon ku na drenta e akademianan den eksterior fásilmente.

 

 

Artistanan internashonal komo dosente….

Aki na Kòrsou no ta simplemente e hóben ta drenta, haña èmber ku fèrf i pinta bai gol. Tirzo Martha a splika Djasabra ku nan tin un tim básiko ku ta konsistí di Tirzo mes, David Bade, Omar Kuwas, Johana Sapara, Visueli Americaan, Siguen Justina. Ta tres di nan a Sali di IBB mes. Tambe nan tin e programa di Arts in Residence ku ta artistanan ku ta bin di afó pa traha ku studiantenan aki. Tin e programa nashonal di artistanan di Ulanda ku ta bin 4 luna pa duna lès aki, tin un IPS ku ta artistanan di rònt mundu ku ta bin traha ku e studiantenan i tin un lokal ku ta traha hóbennan i e di kuater programa ta esun di Film i tambe ta traha film huntu ku e studiantenan i e film ei ta bai e Film, Festival.

 

Ingles òf ulandes….

Na IBB ta usa tur idioma, esta papiamentu, ulandes, ingles i  spañó. Pa loke ta e studio na Ulanda  e por ta na ulandes òf ingles. Loke ta importante pa nan segun Tirzo ta ku e chèns pa e hóben ta slag. Tin hóbennan ku nan ulandes ta laga di deseo i nan ingles ta hopi bon. I den práktika a keda proba ku nan ta hasi e estudio ku fasilidat den ingles. I den e kaso aki ta e studiante mester ta bon motivá i asina ni idioma ni nada lo strob’é di logra. E preparashon ku IBB ta duna e hóben no ta riba su estudio so pero tambe riba su personalidat pa asina e ta mas disiplina, e mentalidat mester ta otro manera.

 

Biaha i amplia bo konosementu….

Ora hóben bai studia afó, segun Tirzo nan ta purba hink’é den e hóben pa e trata na envolví su mes ku otro hende. E komuniká su mes ku otro hende i konosé otro paisnan. Por ehèmpel na Bèlgika, Fransia arte ta otro kos, meskos ku Italia i Spaña. Ta hinka den e hóben pa e biaha. Esei ta loke Tirzo a hasi, krea un spectrum grandi di referensia i esei ta yud’é den su karera.

 

Den e era di awe ku nos ta papia di historia, nos identidat i kultura ta di sumo importante pa nos papia di nos kultura. Arte kreatividat ta bin di nesesidat di urgensia di ekspreshon i esei ta forma nos. E ta forma nos kon ta bebe, kiko ta bisti, ki outo ta kore etc., etc. A yega tempu pa nos papia di kontenido i na ki nivel i kalidat ke hib’é.

 

LAGA UN KOMENTARIO

Please enter your comment!
Please enter your name here