WILLEMSTAD.- Parlamentario sra. Giselle McWilliam ta hopi desapuntá ku aktitut di su koleganan den oposishon. Esei pa motibu ku nan a skohe pa hasi polítika i bira lomba pa bienestar den komunidat. Manera ta konosí, sra. McWilliam ta e promotor prinsipal tras di e lei pa bienestar di animal aki na Kòrsou, i ayera e proyekto di lei aki lo mester a yega e punto kulminante di su tratamentu i pa eventualmente e keda aprobá. Pero lamentablemente oposishon a bria pa su ousensia pa tratamentu dje lei aki, i tur hende ta komprondé ku esaki tin di haber ku posibel tratamentu di kredensialnan di e próksimo parlamentario pa frakshon di PAR.

Pero segun e parlamentario, ta ser bisá ku e ta hasiendo polítika ku e asuntu aki, siendo ku ta algu ku e tin ta kana su tras i yaya for di 2017 ku e gobièrnu aki a sinta. E proyekto di lei a kana su trayekto i a pasa e diferente stashonnan pa konseho te ku el a ser tratá na dos okashon den komishon sentral. Es mas, tur parlamentario sin eksepshon a duna nan aprobashon na e proyekto di lei aki, pa awor den rekta final nan ta laga e sernan aki na kaya.

Nan no mester lubidá ku tin hopi hende ku ta stima animal, i den e kaso aki nan tabata biba ku e antisipashon ku e lei lo keda aprobá. Organisashonnan manera Dierenbescherming a keda sumamente desapuntá, pasobra ku e lei aki den man nan lo por aktua ku mas firmesa kontra maltrato di animal etc. Pero un biaha mas oposishon a preferá di hasi polítika sin konsiderá ni importá ku bienestar di animal.

Segun McWilliam, bienestar di animal ta bai muchu mas leu ku solamente un bon trato, ku e animal tin mester di bon alimentashon, pero mester tene kuenta ku animalnan sa ta riba kamindanan públiko i nan sa forma peliger pa nan mes i pa otro hende. Mester tene kuenta ku seguridat den bario, pasobra sa sosodé ku kachó ta ataká hende riba kaya. Ora tin hopi kachó ta kana asina riba kaya e ta laga un impreshon robes serka turistanan, pasobra ta parse ku niun hende no ke para responsabel pa e situashon ei.

No mester lubidá ku tin kriadónan di bestia ku ta bira víktima di kachónan ku ta kousa masakre dor di mata i herida nan krionan di kabritu, galiña òf otro espesienan di animal.

Es mas, mester mira e lei pa bienestar di animal aki den kuadro di salubridat tambe, pasobra tin animalnan ku por Sali bai kaya i regresá kas ku malesa ku por kontagiá otro bestianan òf te asta hende. Pues e proyekto aki aki ta presentá a base di un aserkamentu total.

Segun e parlamentario di MAN, e ta desapuntá pero sigur e lo no entregá. Si no ta den e gobernashon aktual, e lei aki lo pasa despues di 19 di mart 2021.