WILLEMSTAD.-Di Parlamento a kaba di drenta e notifikashon na EXTRA ku e ‘Ora di Pregunta’ ku mester a tuma lugá awe 7 di novèmber pa 9’or di mainta, a keda posponé te 21 di novèmber próksimo. Ta asina ku e miembro di Parlamento sr. Croes a hasi petishon pa e ‘Vragenuur’ ku presensia di minister di Salubridat, Medio Ambiente i Naturalesa sr. Pisas. E petishon ta pa trata e desaroyo di playanan na Kòrsou.

Manera ta konosí e momentu ku a sai na kla ku a kuminsá basha betòn na playa di Lagun i ku intenshon pa sigui pa Jeremí esaki a kousa bastante indignashon den komunidat. Mesora a lanta e diskushon pa e plannan ku a keda anunsiá anteriormente pa e playa na Caracasbaai. Sr. Croes (PAR) a pidi un ‘Ora di Pregunta’  pa trata e desaroyo di playanan ku a keda pone riba agènda pa awe.

Parlamento ta informá ku a konsulta ku sr. Croes komo esun ku a hasi e petishon i a skùif e ‘Ora di Pregunta’  te 21 di novèmber.