WILLEMSTAD.- Relashoná ku e tópiko di pèrdida di nashonalidat Hulandes ku parlamentario sra. Ana-Maria Pauletta ta pidiendo klaridat ariba, Minister di Hustisia mr. Shalten Hato a duna un splikashon. Entre otro sra. Pauletta kier a sa kuantu persona a pasa den e situashon aki for di momentu ku e maneho nobo a drenta na vigor. E minister a splika ku un total di 68 persona a pèrdè nan nashonalidat Hulandes for di 2002. I no por bisa ainda kuantu persona mas lo por keda konfrontá ku pèrdida di e nashonalidat ya komo ku ta na momentu ku hasi e petishon pa e.o. renobashon di pasport lo hasi e kòntròlnan korespondiente pa sa kon el a yega na e nashonalidat aki. T’asina ku e mandatario a splika den e mesun reunion aki den Parlamento ku den pasado hopi persona di Repúblika Dominikana a falsifiká dokumentonan pa nan a bira Hulandes, i ku a base di e maneho nobo ku a keda introdusí ta investigá dokumentonan na momentu ku tur hende oriundo di e pais aki hasi un petishon pa renobá pasport. I ta for di e investigashon aki lo por saka afó si e nashonalidat a ser optené a base di un akto froudulento den pasado, ku tur e konsekuensia ku esei por tin.

Kuantu persona a yega di pèrdè nan trabou komo ámtenar debí ku nan a pèrdè nashonalidat Hulandes?

Segun sr. Hato, na momentu ku bai hasi e investigashon i kòntròl, Kranshi no ta wak ki profeshon e persona tin, e no ta relevante e momentu ei. Na momentu ku Kranshi konkluí ku un persona no ta Hulandes, e persona en kuestion lo risibí un karta ku kual e por bai na e Servisio di Atmishon. Tin un akuerdo ku Ministerio di Hustisia, ku e persona ku pèrdè nashonalidat Hulandes lo por haña un pèrmit di estadia pa tempu indefiní. I despues di 5 aña ku e tin e pèrmit indefiní aki e lo por apliká pa nashonalidat Hulandes dor di hasi un petishon pa naturalisashon. Pues Kranshi ta sigui guia e persona aki te ora ku e hasi su petishon pa naturalisashon.

Lei ta bisa ku un ámtenar mester ta Hulandes, esei ta algu stipulá den LMA. Pa e personanan ku tabata ámtenar, gobièrnu dje tempu ei a solushoná esaki dor di ofresé nan un kontrato pa un periodo indefiní. Pero den e kontrato ei e persona ta bai di akuerdo tambe ku LMA i otro areglo i leinan aplikabel pa un ámtenar ta konta pe tambe. Pues e persona ei ta risibí práktikamente e mesun derechonan ku un ámtenar.