WILLEMSTAD.-  Ministerio di Enseñansa, Siensia, Kultura i Deporte (ESKD) a manda un karta ku informashon relashoná ku e kalor na skol pa tur direktiva di skol. Den e karta Minister Sithree van Heydoorn ta splika ku ta sigui e reglanan aprobá pa Ministerio di ESKD i konforme e ‘richtlijnen’ di Ministerio di Salubridat Públiko, Medio Ambiente i Naturalesa. Na momento ku Servisio di Meteo anunsiá kódigo hel, direktivanan di skol huntu ku skolnan por tuma medida.

Den e karta minister ta bisa ku relashoná ku e ola di kalor ku tin na momentu aki, i ku bista riba salú i bienestar di tantu alumnonan komo trahadónan, ministerio enseñansa ta hasi un apelashon riba tur direktivanan di skol pa tuma e medidanan nesesario. P’esei e ta hasi un petishon na nan pa tene kuenta ku e liña di maneho di ministerio di salubridat (GMN) den e periodo aki.

Konforme e último indikashon i palabrashonnan di GMN, ta di gran importansia ku ora Servisio meteorológiko di Kòrsou mèldu ku tin kódigo hel na skolnan dirèkt por introdusí nan roster di lès kòrtiku. Pa Enseñansa di Fundeshi ta konta ku skolnan ta sera 12 or di mèrdia. Pa skolnan avansá, lèsnan mester bira 30 minüt, enbes di 45 minüt.

Si tin kuestion di un sirkunstansia eksepshonal òf un situashon spesífiko di e lokalidat di skol, dor di kual e temperatura ta bira ekstremadamente haltu, responsabel i kaminda ta nesesario pa introdusí e dia di lès mas kòrtiku i esaki ta pa protekshon di salú di tantu e alumnonan i personal. Den e kaso spesífiko aki, e direktivanan di skol mester entregá un prosèsverbal na ministerio enseñansa.

Ademas ta pidi pa tene kuenta ku aktividatnan ku ta hasi pafó di lokal den e periodo aki, e maneho ta konta te ku fin di sèptèmber 2024. Ademas tur skol mester tin sufisiente provishon di awa pa alumnonan i e personal.