WILLEMSTAD.- Fo’i momentu ku a sali riba Facebook ku lo tin menasa i instigashon kontra miembronan di Kuerpo Polisial di Kòrsou, Ministerio Públiko ta den alerta. Asina sra. fiskal mr. Monique Dennaoui a trese dilanti durante un enkuentro ku prensa ayera tardi relashoná ku e insidente unda polis mester a usa forsa pa a detené dos persona. Sra. Dennaoui tambe a mustra ku lo no tolerá ningun klase di menasa i tampoko instigashon kontra polis. Mas aleu el a bisa ku, e no tin nada kontra hendenan ku ta graba ku telefòn loke ku ta sosodé riba kaya, pero semper ta bon si pa hende tin henter e bèrdat i no e mitar bèrdat. Ora di graba, e chèns ta grandi ku bo ta graba e mitar bèrdat, pasobra den tur suseso tin un komienso, i ora di graba mayoria biaha bo no tin e komienso.
E polis aki segun sra. Dennaoui tabata blanko di menasanan serio, ku ta pidi pa likid’é mes. Instigashon ta algu hopi serio, i tin biaha hende no ta para ketu na e aspekto aki. Na momentu ku bo ta trata di influensia un hende, pues instigá un hende pa e kometé un echo kastigabel, e ta un problema kaba. Pues na momentu ku riba Facebook a deklará ku tin di mata e polis etc., e ta instigando i esei ta kastigabel. Anto esei ta solamente instigá, sin papia mes di menasa ainda, ku ta algu mas serio. Esei ta base di e investigashon di Ministerio Públiko i ku a kondusí na un detenshon kaba ayera tardi.
Mas aleu el a reitera ku Ministerio Públiko no ta tolerá ningun tipo di menasa ni instigashon, anto esei kontra ningun hende, e no ta konta pa polis so! No lubidá ku miembronan di Kuerpo Polisial ta Sali fo’i nan kas tur dia pa salbaguardiá seguridat di tur hende, i nan no meresé di haña nan mes konfrontá despues ku e tipo di aktonan aki.
E kaso aki ta hopi serio ya ku a pone foto di e polis en kuestion riba Facebook, su famia etc., i e tipo di kosnan aki no ta ser akseptá. Nan ta laga nan famia pa garantisá seguridat di pueblo, i e ta ser menasa. Si bo ta haña ku polis a aktua di un forma inhustu kontra bo, semper por entrega un keho na Ministerio Públiko.
Finalmente el a bisa ku, e ta kontentu ku teknologia moderno ta pone ku hopi hende por graba lokenan ku pasa, pero kòrdá si ku e chèns ta grandi ku bo ta graba mitar bèrdat, pasobra semper den tur kos tabatin un komienso, i hopi biaha ora di graba bo no tin e komienso.