WILLEMSTAD.- Ministerio di salubridat ta informá ku Kòrsou tin atenshon pa ku desaroyo dje vírus ku a originá na China ku ta karga e nòmber “novel corona”.
Dia 31 di desèmber 2019 e ofisina di e Organisashon Mundial di Salú (WHO) na China a keda informá ku tin kasonan di pulmonia di orígen deskonosí detektá na Wuhan, provinsia di Hubei na China. Mientrastantu e kasonan a keda identifiká komo e vírùs “novel corona” (2019-nCoV) serka outoridatnan chines dia 7 di yanüari 2020.
Organisashon Mundial di Salú (WHO) a aktivá e ret di monitoreo tantu regional i mundial i ta urgi tur pais pa ta alerta i tambe prepará.
E síntomanan di e infekshon ta entre otro difikultat pa hala rosea, keintura, tosamentu, rosea kòrtiku/problema pa hala rosea. Den kaso mas severo e infekshon por kousa pulmonia, por presentá un síndrome agudo i severo di kapasidat di respirashon, malfunshon di nir i hasta por ta kousa di morto.
Ainda no tin informashon konfirmá di kon e vírus ta keda transmití. Tin informashon ku tin kaso di transmishon di hende pa hende. Tumando na kuenta ku e ta kousa infekshon respiratorio, ta rekomendabel pa tuma medidanan di prekoushon pa redusí e riesgo manera e.o. laba man ku awa i habon ku frekuensia, evitá kontakto ku personanan ku tin un infekshon di respirashon. Pasaheronan ku síntoma di infekshon agudo respiratiorio mester limitá kontakto ku otronan pa kontagiá nan, ora tosa òf nister tapa boka i nanishi ku lensu di papel i tira esaki den kos di sushi i no riba suela, laba bo man frekuentemente ku awa i habon i buska kuido médiko.
Kasonan raportá pa WHO ta indiká ku tin kasonan na China i a registrá unu na Thailand, Hapon i Korea. Tambe a registrá un promé kaso na Washington, Estádos Unídos. Ta trata den tur e último paisnan aki di un persona ku a bishitá China i a kontagiá aya.
Servisio di Salú Públiko (UO G&Gz) ta keda monitoria i traha estrechamente ku outoridat i profeshonalnan den kuido i otro organisashonnan pa ta alerta pa kualkier kaso partikular. Na momentu ku tin mas informashon relevante i di prevenshon Servisio di Salú lo informá komunidat.