WILLEMSTAD.- Ministerio di Enseñansa, Siensia, Kultura i Deporte (ESKD) ta informá ku orario di skol ta normalisá bèk konforme e orario regular entrante 14 òktober 2024. Minister di ESKD sr. Sithree van Heydoorn a informá tur e direktivanan di skol di e desishon relashoná ku normalisashon di orario di skol. Esaki ta basá riba e situashon klimatológiko relashoná ku e kantidat di áwaseru ku a kai último. Den un karta dirigí na direktiva di skolnan Minister a indiká ku e desishon ta na vigor entrante djaluna 14 òktober 2024. Tambe a pidi pa keda monitoriá e situashon klimatológiko i vigilá e situashon. Minister ta indiká di keda pendiente di e situashon di kalor i den kaso ku mester e lo tuma un desishon pa ku medidanan nesesario huntu ku tur e ‘stakeholders’ di den enseñansa.