Eliminando artíkulo 5 insiso 1 di lei notarial

WILLEMSTAD. - Un di e problemátikanan ku ta persistí último tempunan ta esun di notarionan, esta ku lista di espera pa yega na un afsprak por dura mas ku un aña pa kosnan simpel. Esaki ta loke ku tur sektor ku ta dependé di servisio notarial o sea sivil ta eksperensiando último tempunan. Na opinion di e sektor di abogasia, tin solushon pa esaki, basta ku hasi adaptashon den lei, asina Dekano di Orden di Abogado mr. Carine Jänsch a trese dilanti na okashon di huramentashon di tres wes nobo, djabièrnè último.

Dekano di Orden di Abogado mr. Jänsch den su diskurso a splika ku e persepshon den e mundu di notario ta ku e preshon di trabou ta haltu. E dekano a mustra riba e echo ku abogadonan tin problema pa haña un afsprak riba término korto ku un notario. Esaki ta trese hopi komplikashon pa trabounan ku mester keda realisá manera derecho di propiedat, benta di propiedatnan inmóbil, lantamentu di kompania i tambe prosesonan hudisial por sufri retrasonan grandi pa motibu ku no por keda kla na tempu ku aspektonan notarial.

Resientemente tabatin un enkuentro entre di Minister di Hustisia i sektor di notario i tambe abogasia, kaminda ku e notarionan a rekonosé e problemátika menshoná. Na opinion di notarionan, e problema no ta sintá na e echo ku mester habri lugá pa nombra mas notario, esta si bin mas notario, lo no yuda e kousa. E problema eksistente ta ku tin tiki kandidato pa notario i falta di personal kapasitá. E kurso nobo di 1 aña ku universidat a introdusí di derecho notarial lo mester suavisá e problemátika aki.

Refiriendo riba e konsepto pa trese kambio den “Landsverordening Notarisambt”, e Dekano a mustra riba artíkulo 5 insiso 1 di e “Landsverordening” aktual, ku ta hasi menshon ku un notario ta prohibí pa drenta den koperashon ku un òf mas notario i un òf mas profeshonalnan manera abogado. Esaki ta solamente posibel si hasi petishon na ‘Kolegio di Supervishon di Notario’ pa un dispensashon pa por haña e outorisashon pa traha den koperashon ku un òf mas profeshonal.

Orden di Abogado ta supliká pa skrap e lei aki i asina habri kaminda ku notarionan por traha den koperashon ku otro profeshonalnan manera entre otro bufetenan di abogado ku tin e spesialidat den nan ofisina.

Esaki sin mas lo trese alivio enorme den e trabounan notarial i lo ta na benefisio di komunidat di Kòrsou en general i tambe esunnan ku ta buskando nan derecho en partikular.