WILLEMSTAD.- Dia 8 di yanüari próksimo ta dia di e evento akuátiko mas grandi na Kòrsou, Fuikdag. Ya kaba kadena hudisial a anunsiá medidanan ku lo tuma, i ku e aña aki e aktividat ta terminá 5’or di atardi.

Sinembargo a lubidá di focus riba limpiesa di Fuikbaai. E grupo di boluntario tur aña ta hasi limpiesa tantu kantu di playa komo riba den laman.

EXTRA a papia ku sra. Josette Kölker ku ta un dje boluntarionan huntu ku sra. Corinne Senior ku ta hasi limpiesa despues di Fuikdag i laga e playa limpi atrobe.

Sra. Kölker ta spera ku e aña aki tambe baidónan di Fuikdag lo kòrdá riba nan responsabilidat di limpiesa. For di 10’or di mainta nan ta kuminsá parti saku di sushi. Nan a haña e sakunan serka Selikor i Firgos. Nan lo sigui hasi esaki te 3’or di atardi.

Naturalmente ta konsehá tur hende ku tin sushi pa bai kas ku esaki. Si esei no te kaso, por depositá e saku den kònteiner di Selikor ku ta stashoná riba e Playa di Fuik.

Señora Kölker ta spera ku e aña aki e kantidat di sushi ta ménos atrobe ku aña pasá. Ounke ku aña pasá nan a mira un bahada dje kantidat di sushi ku tabatin 4 aña pasá.

E trabou di e boluntarionan mes ta kuminsá ora siman habri ku limpiesa dje playa i mas den wikènt lo sambuyá pa kaba di hasi e limpiesa den fondo di laman.

Tambe un s

upliká pa chupnan ku ta mara na boto òf otro ophetonan di plèstik di dibertishon mara na botonan ku por bula bai, pa paga tinu ku esakinan ta bon mará.

E aña aki lo dediká e parti di trabou boluntario na un gran baidó i amante di Fuikdag, Martin Rusch, kende a fayesé aña pasá. Martin Rusch semper a bai Fuikdag i tabata e boluntarionan di promé ora ku tabata hasi limpiesa dje playa.

Segun sifranan ku EXTRA tin aña 2015 a rekohé 1410 kilo di sushi. E kantidat ta 700 kilo ménos kompará ku aña 2014 ku tabata 2100 kilo. Aña pasá e sifra tambe tabata abou.