WILLEMSTAD.- “Mi kier sa e tempu debido ta aworakí. Nos a yega e debido tempu. For ora tin asina tantu konsternashon den komunidat riba algu di e índole aki, e ta un indikashon ku ta na e debido tempu pa pueblo haña a e informashon ku e meresé di haña.”
Asina parlamentario pa partido Nashonal, Sheldry Osepa ta duna di konosé relashoná ku e konsternashon ku a surgi rondó di e kontrato ku Refineria di Kòrsou (RdK) a firma ku e kolonia Oryx Midstream pa maneho di instalashonnan na Bullenbaai i Emmastad pa próksimo 30 aña.
Osepa ta lamentá ku tin un diskushon i falta di informashon riba refineria. Esaki no tabata nesesario i mester siña lès for di esaki, e ta opiná. “Den gobernashon mester siña manehá espektativa. Si siña esaki ta evitá e diskushonnan aki i evitá sentimentunan di disgustu den pueblo.”
E parlamentario mes no ta na haltura di e kontenido di loke a firma i no por duna un opinion riba esaki. E ta kere ku gobièrnu komo akshonista mester informá komunidat mas lihé posibel di e detayenan di e akuerdo pa medio di parlamento di parlamento.
Segun Osepa ora gobièrnu tuma desishon i si e no involukrá parlamento òf otro stakeholder den su proseso e tin ku spera e tipo di konsternashonnan aki. “Ta p’esei mi ta bisa mester siña for di e situashonnan aki.”
Un kos ku na opinion di Osepa gobièrnu mester hasi ta manehá espektativa. “Si bo sa ku ta un desishon grandi bo ta bai tuma no kere ku si bo skonde i saka esaki direpente ku tur hende ta bai karga e desishon aki.”
E parlamentario ta referí mas aleu na loke eks promé minister di Antianan Hulandes, Maria Liberia-Peters a bisa riba e firmamentu indikando ku e ta kontentu ku Liberia-Peters a sali i bisa ku tin un forma di hasi e tipo di kosnan kaminda ta tur hende ta karga e desishonnan ku tuma. “P’esei un biaha mas mi ta bisa ku mi no tin sufisiente informashon pa duna opinion balansá, pero mi ta lamentá ku nos ta den un diskushon pa un kos ku mester a sali na bienestar di pueblo.”
Segun Osepa kada un hende ku haña trabou, kada un famia ku por paga su hipotek òf fiansa di outo i kada famia ku por sòru di pone pan riba mesa ta algu ku mester aploudí “Ke men ora e bira e tipo di diskushon ku ta tumando lugá e ta di lamentá i mester siña for di dje pa evitá ku komunidat ta bolbe hañ’é den e fase ku e ta hañ’é aworakí.”
E parlamentario ta kere ku ta bon pa pone un reunion di parlamento, ounke ku ta den reseso, pasobra e konsternashon ta grandi, hopi hende ta insigur i ta tende hopi disgustu. “Harma un reunion pa asina pueblo ta haña informashon i e ta yuda duna direkshon di loke nan tin riba mesa.”
Tur loke ku tin di aber ku refineria, esta Osepa ta di interes grandi. Komo akshonista gobièrnu tin sierto grado informashon ku e por kompartí pa asina yuda trese trankilidat i krea sosten den komunidat (“draagvlak”). “E eror ku nan a kometé ta ku a kere ku si nan sali kore bai despues di firma i saka portrèt, ku pueblo ta yuda karga e akuerdo tòg.”
Segun Osepa pueblo di Kòrsou no ta funshoná asina. “Mester a konosé e pueblo mihó. Mester a kue tur hende tene na man, mustra nan e proyekto, laga nan papia i kritiká pasobra mas konseho bo tin mas sabí bo ta bira.”
Finalmente Osepa ta bisa ku e ta kere ku por drecha e situashon ainda. “Involukrá pueblo i parlamento, laga demokrasia traha i no stroba e proseso demokrátiko.” Asina segun Osepa tur hende ke sa kiko ta bai ta e maneho pa futuro di refineria.
“Ta esei ta e pregunta básiko ku tur hende ta hasi. Nan a bai solisitá i ta warda. Ta den e kuadro aki informashon mester bini pa komunidat sa eksaktamente kiko e kos ta i pa e proseso demokrátiko hasi su trabou.”