Frakshon di PNP ta prepará pa reunion ku Silvania

WILLEMSTAD.- Mester sòru ku parlamento ta den posishon pa e por hasi su trabou. Un bon komienso pa logra esaki ta ku gobièrnu ta kuminsá respetá e protokòl ku a firma ku parlamento kaminda ta kontestá preguntanan ku parlamentarionan hasi den e periodo stipulá di máksimo 2 luna.

Asina lider di frakshon di Partido Nashonal di Pueblo (PNP), Sheldry Osepa ta deklará. El a bisa ku el a tuma nota di e delaster karta ku presidente di parlamento a saka riba e tópiko aki kaminda el a mira ku tin kantidat di karta ku pregunta ku ministernan no a kontesta.

“Esaki ta inkluso algun karta ku pregunta ku mi mes tambe a manda.” Osepa ta di akuerdo ku otro ponensianan ku a bin dilanti, manera di hurista Eldon ‘Peppie’ Sulvaran, ku mester garantisá ku tin mas transparensia.

“Parlamento ta pueblo i gobièrnu mester sòru ku e órgano por hasi su trabou. Si no bini den reunion pa duna informashon òf no kontesta kartanan ku pregunta, e ròl di parlamento ta bira difísil pa ehekutá.”

Osepa ta mustra mas aleu ku ta esakinan ta e instrumentonan di derecho di pregunta i derecho di interpelashon parlamento tin pa hasi su trabou.

Eksonerashon

Un batata kayente ku parlamento ta bai sigui atendé 19 ougùstùs awor ta e desishon di minister di Finansa, Javier Silvania pa a duna eksonerashon pa alrededor di 3 miar florin na debe di impuesto. Segun informashon ku EXTRA ta disponé di dje frakshon di Nashonal lo reuní djaluna 12 ougùstùs riba e kon pa atendé ku e reunion di 19 di ougùstùs.

Osepa den deklarashon pa EXTRA ta bisa ku e ta reservá su opinion riba e tópiko spesífiko aki pa un ratu mas. Loke el a bisa sí ta ku e ta haña ku en general gobièrnu mester kumpli mas mihó ku duna informashon na parlamento pa asina e órgano por hasi su trabou.

E reunion di Komishon Sentral ku Silvania ta kontinuá despues di mas ku 1 aña i 3 luna. A suspendé e reunion pa silvania kontesta pregunta di parlamentarionan for di 11 mei 2022.

Lider di frakshon di PAR den parlamento, Quincy Girigorie den karta ku el a manda resien pa Silvania ta pidi pa manda tur dokumento, konseho i desishonnan relevante ku a kondusí na e desishon pa eksonerá algun miar florin na debe di impuesto, inkluso e instrukshon formal di minister di Finansa pa hasi e eksonerashon aki. Esaki mirando e periodo largu ku a pasa for di inisio di e reunion i pa parlamento por hasi su trabou di kòntròl di maneho di gobièrnu na un forma efektivo.

Girigorie ta urgi Silvania pa manda e dokumentashon pa mas tardá djamars 13 di ougùstùs, pa asina e miembronan di parlamento ku ta deseá di hasi nan trabou ku e preparashon i seriedat ku e trabou parlamentario ta eksigí, por prepará nan mes debidamente pa e reunion.

Foto:

...Sheldry Osepa...