Ostpùnt; konosé un poko mas di su historia

 

Emlyn Pietersz di One Curaçao a organisá un eskurshon na parti ost di Kòrsou. Nos a sera konosí un poko mas ku e área, un poko di e historia ku bo no ta tende fásilmente. E zona aki ta e zona 65 i Emlyn a splika ta un di esnan mas grandi den e área ei i ku ta envolví diferente famia entre nan famia Maal. Pa e eskurshon a bira un realidat mester a haña aprobashon di diferente famia pa asina por a subi e tereno i yega te na Choloma, kaminda e partisipantenan di e eskurshon por a relahá i konosé un poko mas di su historia. Einan ta konsiderá komo e promé bientu ku ta yega/supla na Kòrsou


Asin’aki Kòrsou tabata…

Ostpùnt ta apart pasobra aki ta topa yen kos ku otro kaminda no ta topa, kaminda tabatin infrastruktura, a kap diferente palu i mata i ku a konosé asfalt, pero den e área kaminda a bishita ta intakto ainda. Na otro banda e ta duna un idea kon henter Kòrsou tabata.

 

Mas grandi ku St. Maarten…

Ostpùnt ta un área konsiderá asta mas grandi ku St. Maarten kompleto. E superfisie na kilometer kuadra sigur i asta mester konsiderá e otro partinan ku ta kai bou di e zona ei i ku ta hasié aun mas grandi ku St. Maarten. Hopi bia segun Emlyn su splikashon, ta papia di tereno di Maal komosifuera ta esei so ta e área di Ostpùnt pero Ostpùnt ta mas grandi ku esei.

 

Tres fase….

E eskurshon ku a bishita Ostpùnt den wikènt pasa ta e promé fase miéntras ainda falta e di dos i di tres fase. E di dos fase di e eskurshon na Ostpùnt lo bai den boto i lo kore den St. Jorisbaai ku ta bini di e nòmber San Jorge i lo yega diferente otro tereno di Ostpùnt. E di tres parti tambe lo bai ku boto i bus i lo subi di un otro parti di Ostpùnt i lo yega hopi serka di e parti Ost ku a haña e nòmber asina serka ulandesnan debí na e posishon di solo.

 

For di Janwé kabes pariba….

E eskurshon a kuminsá for di Misa di Janwé. Einan e grupo a subi bus grandi ku èrko i tumba kabes pariba. Emlyn a duna splikashon amplio. E tin un konosementu amplio di Kòrsou su historia. Meskos el a menshoná ku den e área di Ostpùnt tin diferente doño. Tin hendenan ku famianan diferente pero ku ta famia di otro i ku famnan paresido pero ta skrufmentu di lèter tabatin e tempu aya.

 

Fuik/Seru Grandi….

Hopi hende ta yama e punta di Kòrsou aki Fuik pero su nòmber ta Seru Grandi. Diferente di e nòmbernan tin un nifikashon manera Sabana Baka pasobra einan tabata kria baha. I ta konosí ku den e área ei tin un yerba ideal pa baka. I asina e splikashonnan a sigui di loke nos por a tuma nota di dje na Ostpùnt.

 

Wapoti….

A hala nos atenshon e nòmbernan di kaya manera Kaya Wapoti….kiko e ta nifiká?

Mayoria di nos den e bus òf praktikamente niun hende tabata sa. Pero e tin su nifikashon….esei nos lo laga na Emlyn mes pa splika durante di e eskurshonnan ku e ta organisá. Intenshon di e relato aki ta pa nos por krea e interes serka nos hendenan pa tambe tuma parti na e tipo di eskurshonnan aki i konosé Kòrsou mas profundo.

 

Ántes por a subi e tereno di Ostpùnt pero awendia e ta sera. Tin diferente lanthùis riba e tereno i tin lanthùis ku famianan a bandoná i laga esaki para kaba na nada. Ostpùnt tin diferente mata ku nos no ta topa otro kaminda.

 

One Curaçao….

One Curaçao ta organisá diferente eskurshon. E nòmber ei ta skohe konsientemente pasobra nan ke pa konosé Kòrsou komo un Kòrsou i prinsipalmente e partinan sekreto  ku ta asina bunita. E ta duna mas balor pa bo patria i ménos chèns ku ke destruí. Ora bo konosé algu i sa su balor e ta duna e hende ménos chèns pa destruí esaki i e ta sòru pa patriotismo i mas stimashon pa bo lugá ku bo ke konserva su bunitesa, esaki ta meta di One Curaçao pa hasi kosnan ku nunka a hasi i haña balor

 

Diferente guiado…

Den e eskurshonnan di One Curaçao ta haña otro guianan di turista. Segun e splikashon di Emlyn nan ta traha ku mas di 20 guia i ta usa nan den kada un su spesialisashon. Den e kaso spesífiko aki tabatin Terence Ching ku su spesialidat ta flora i founa i prinsipalmente e konekshon di protekshon di Stichting Uniek Curaçao ku e ta pertenesé na dje.

 

Mas turista, pero mas pa hende lokal….

E eskurshonnan aki no ta pa turista so pero spesial pa hende lokal. E grupo di hende lokal kada bes ta birando mas i mas grandi i e ta spera ku lo yega un dia ku mayoria di yu di Kòrsou tòg a konosé nan isla manera mester ta. Te ainda esaki no ta e kaso i e ta di lamentá. Tin basta kos ku si bai bek den skol e no ta den e kuríkulo di enseñansa i nos ta lanta ku mayornan ku no por siña e yu riba e temanan aki,pasobra nan tampoko no a haña esakinan. Kisas den patfenderei ta otro. Emlyn a bisa ku el a siña hopi debí na su pashon i awor sigur su trabou. Mayoria hende te awe no sa i nunka a tende di dje. Esnan interesá  por whatsapp na e number +59995271799 pa e siguiente fasenan di e eskurshon  na Ostpùnt. I tambe por kontaktá via di facebook di One Curaçao.

 

SHARE

LEAVE A REPLY