WILLEMSTAD - Djaluna 25 di febrüari 2019, alrededor di 07.19 or, Sentral di Polis a risibí informashon di un aksidente di tráfiko ku a tuma lugá riba Weg naar Westpunt na altura di Tera Kora. For di un investigashon preliminar ku polis a hasi na e sitio a resultá ku un outo tabata kore riba Weg naar Westpunt direkshon di rotònde di Zegu. Diripiente e outomobilista aki a kita na su man robes pa bai pasa outo nèt na momentu ku un vehíkulo ku tabata kore riba Weg naar Westpunt den direkshon di Banda Abou tabata aserkando. E dos vehíkulonan a dal frontal ku konsekuensia ku shofùr di e vehíkulo ku tabata kore den direkshon di Banda Abou a fayesé na e sitio.

Dòkter di polis ku a presentá na e sitio a konstatá morto di e hòmber Hubert P, Adelina, nasé na Kòrsou dia 4 yanüari 1953.

Personal di Departamento di Tráfiko ta kontinuá ku e investigashon.