WILLEMSTAD- Deporte di Kòrsou ta di luto ku morto di Sra. Edith Mac Leod-Koster. Sra. Edith, kasá di Franklyn (Frank) Mac Leod i mama di e deportista Mary-Ann Mac Leod, a dediká masha hopi aña di su bida na deporte. Huntu ku esei tin di skibi ku e tabata un persona ku tabata stima entrená i eduká mucha, i ku amor spesial.

                               ...Edith Komo Deportista...

Edith tabata práktika e deporte di Yudo kaminda e la logra hopi éksito, ounke e tabata mas konosí kisas den Tènis di Mesa (pin pon). E la start ku e deporte di tènis di mesa na skol hungando ku amiganan di skol durante pousa. Edith su amor pa e wega a krese, i a la kuminsá train Tènis di Mesa serka Reene Davelaar,  pa despues pasa pa train na Asiento i Dam Negropont. Tambe el a práktika hopi den Sala di Gymnastiek di Peter Stuyvesant College i Sentro di Bario Brievengat. Na aña 1984 el a djòin amantenan di e deporte di tènis di mesa den Sala si Rekreo Irene Moreno na Muizenberg.

                           ...Kampeon Di Kòrsou Na Aña 1966...

Edith su talento i amor pa e deporte a pone ku na aña 1966 e la logra su promé título di kampeon di Kòrsou. Na 9 okashon Edith a sa di bira kampeon di Kòrsou ganando e título den “Single”. Tambe Edith na vários okashon a gana e título di “double”, i “double-miksto”. Na 5 okashon el a pone man riba e máksimo distinshon di federashon di tènis ku ta e: “C.T.T.B. Cup”.

                                                                  ...Klup Tornado...

Edith huntu ku su kasá Frank (Franklyn), tabatin un pashon spesial pa atendé ku mucha. Edith a lanta su klup di Tènis di Mesa, SV Tornado. Klup ku a produsí diferente kampeon di Kòrsou manera: Mary-Ann, yu di Edith i Frank, Ilona Martina, Mishenou Fraaij, Fredira Alberto, su ruman Maureen Koster i Christina Dania.

                       ...Miembro Honorario di C.T.T.B...

Tambe Edith ku hopi amor i dedikashon a traha vários aña den direktiva di Federashon di Tènis di Mesa. Pa e dedikashon i amor di Edith na e deporte di Tènis di Mesa Federashon dje deporte a hasi Edith Miembro Honorario.

                        ...Torneo Na Honor Di Frank i Edith...

Pa duna honor na Edith i su kasá Frank, tur aña CTTB ta organisá un torneo “double-mixto” ku ta karga e nòmber di Edith i Frank. Deporte di Kòrsou, i di Tènis di Mesa ta di luto ku morto di Sra. Edith Mac Leod, un baluarte di nos deporte.

                                        ...Kondolensia...

Palabra di kondolensia ta bai na su kasá inseparabel amigu Frank Mac Cleod i su yunan: Mary-Ann i Hetty. I naturalmente hinter famia i e famia di Tènis di Mesa.

                                    ...Akto Di Entiero...

Akto di entiero ta tuma lugá djaweps 17 di aprel saliendo for di El Tributo Otrabanda Sala II pa Santana Katóliko na Roodeweg. Ta risibí bishita di kondolensia di 9or di mainta pa 10.15 am. Ta sigui ku un rèspòns.

(Datonan a keda kompilá pa Frank Mathilda i Taffy de Jongh)