PHILIPSBURG/WILLEMSTAD.-Awe mainta, 18 di novèmber 2019, a detené e yu di Kòrsou di 62 aña R.A.d.S, den kuadro di e investigashon Maximus. E detenshon a tuma lugá na Sint Maarten. A base di e investigashon andando, Ministerio Públiko a demandá aresto preventivo (e promé ocho dianan) pa R.A.d.S. na e hues komisario di Kòrsou. Teniendo kuenta ku e prosès verbal presentá, hues komisario a husga ku tin sufisiente opheshon i motibunan grave i p’esei a ordená e detenshon preventivo. Awe mainta a ehekutá e òrdu aki. E aresto preventivo ta bálido pa 8 dia. Awe hues komisario di Sint Maarten lo interogá R.A.d.S. Lo traslad’é mas pronto posibel pa Kòrsou pa mas investigashon. Na e momentu aki lo no duna mas informashon tokante e detenshon i/òf e investigashon.

Otro detenshon den kaso asesinato Wiels

Informashon ku EXTRA ta disponé di dje ta indiká ku Ministerio Públiko a detené R.S komo sospechoso den e kaso di asesinato di polítiko Helmin Wiels. E detenshon a tuma lugá na St.Maarten. Ministerio Públiko na e momentunan aki ta atendiendo e detayenan i komo tal EXTRA lo trese e detayenan asina ku esakinan ta kla pa bira públiko.

Despues ku a sentensia e hòmber Jamaloodin den e kaso di asesinato di Wiels, komo esun òf esnan ku a plania, organisá i paga pa laga kometé e krímen awor por mira ku OM no a laga e kaso keda te einan. A sigui investigá te ku a yega asina leu ku a hasi e detenshon di R.S.

Den pasado kaba a yega di detené R.S relashoná ku e mesun kaso di asesinato aki pero a lag’é den libertat. Meskos anteriormente a detené Jamaloodin tambe, pero a lag’é den libertat. Keda pendiente manera OM ta den posishon di suministrá EXTRA e detayenan nos lo trese eseinan.