WILLEMSTAD.- Aparentemente komersiantenan asiátiko ku tin un restorant no ta tene, skucha òf mira loke ta pasa ku nan paisanonan, i ta sigui traha den kushina a-higiéniko. Durante kontròl realisá ayera djaweps dor di tim Multidisiplinario konsistiendo di Inspekshon Ekonómiko, GMN/THZ/Millieu i SBAB a konstatá un situashon sumamente a-higiéniko na Zheng Restaurant situá na Corrieweg. Galiña i karni tur na muskita. Berdura poné den baki na suela, i e lugá ta shushi i bruá. E tim a para tur operashon i sera e establesimentu inmediatamente. E tim ta remarká ku e lugá tin un fachada bunita i hopi yamativo, pero lokual ta trata kushina, esaki ta kompletamente for di òrdu. Tambe e tim a realisá kontròl na Mangusa Hypermarket su Foodstation i Bakkerij. E establesimentu aki tabata den kumplimentu tantu ekonómiko i higiéniko.