WILLEMSTAD.-Un kantidat di produktonan petrolero ta bai findishi pa keda bende otro siman djabièrnè den un findishi. Ta trata di produktonan ku ta den tankinan riba tereno di Isla na Emmastad i ku Refineria di Kòrsou (RdK) ta bende na findishi. Ta trata di krudo, gasoil, ‘light Naphta’, gasolin Mogas, ‘diluent’, tambe ‘white oil slops’ i ‘fuel oil’ tur ta den tankinan wardá.

Ta e intenshon pa djabièrnè 28 di mei bende e produktonan aki den findishi pa asina RdK por rekobrá partinan di plaka ku PDVSA mester paga ainda pa diferente servisionan risibi den pasado.

Manera ta konosí RdK a bai korte na algun okashon pa eksigí kumplimentu di parti di PDVSA ku e debenan atrasá. E parti di operashon di e refineria ta kostando basta plaka i RdK ta kubriendo esei hasiendo uso di su propio fondonan. E trahadónan mas esensial di e refineria RdK a tuma den servisio di CRU ku ta un kompania supsidiá di RdK.