WILLEMSTAD – Ayera den oranan di atardi algun siklista ku tabata eherse nan deporte faborito den area di Piscadera pa mas eksakto tras di Royal Marina, a bin topa pa nan sorpresa ku un bisé (yu di baka) morto benta kantu kaminda. Apesar di hopi programa di konsientisashon diariamente, propagandanan pa yuda tene nos isla limpi, tòg esaki ta keda un problema den nos komunidat. Personanan sin eskrúpulo i sin remordimentu ta preferá di benta shushi den kualke área, en bes di hasi esaki na Landfill òf Mal pais. Kamarógrafo di Extra durante ku e tabata hasi su trabou, a deskubrí un landfill kompletu patras di Royal Marina. Aki tabatin un kantidat di shushi bentá, manera entre otro bùmpernan di outo, bestia morto i vários otro shushedat mas.
Esaki sigur ta algu hopi tristu pa nos isla. Durante e problema di kimamentu di shushi na Dam Pretu, minister di salubridat sr. Silvania a bisa ku gobièrnu lo bai sinta na mesa ku Selikor, pa wak si pa algun luna tur hende por bai benta nan shushi grátis, miéntras lo buska un solushon pa baha preis pa benta shushi sea na Mal Pais òf Selikor na Koraal Specht.
Te ainda no a bira konosí kiko ta bai pasa den e kaso aki, pero ta di spera ku lo bin un solushon pa evitá e situashon aki.
