WILLEMSTAD.- Komunidat di Kòrsou a pasa den su promé siman di vakunashon, i por bisa ku e siman aki tabata eksitoso. A trata aki di un siman komo proyekto piloto. Asina Minister di Salubridat, Medioambiente i Naturalesa, sra. Zita Jesus-Leito, a duna di konosé durante un enkuentro ku prensa ayera. Segun e minister, den esun siman aki por a evaluá i wak unda e proseso ta kana bon pero tambe unda tabatin mester di adaptashon. Pero kon eksitoso e siman di vakunashon aki tabata ta algu visibel, i prueba di esei ta ku otro siman Kòrsou lo risibí e di dos karga dje vakuna aki for di Hulanda.

Naturalmente hañamentu di vakuna no ta algu ku ta bai outomátiko, ya ku e palabrashonnan ku tin den Reino ta ku lo kontrolá, evaluá i basá riba esaki ta sigui manda e kantidat ku tin mester. Komo pais den Reino, Kòrsou mester a proba ku el a atené su mes debidamente na tur kriterio, e regla i prosesonan manera a keda akordá ku otro. I mester a yega sikiera na e kantidat di hende vakuná ku a premirá i plania pe inisialmente.

Mas aleu e mandatario a duna di konosé ku for di djamars próksimo lo bira posibel pa registrá pa vakunashon via di e portal ‘online’ www.vakuna.cw

Gobièrnu a tuma nota ku esaki di bèrdat ta tresiendo alivio, esei pa motibu ku tin hopi yamada ta drentando via e number di tel. 9345 tambe. Pues e kehonan ku tabatin ku no ta haña kontesta di telefòn tambe a baha konsiderablemente.

Segun sra. Jesus-Leito, for di e reakshonnan di públiko por a nota algu otro tambe, i esei ta ku hopi hende ta impreshoná ku e servisio profeshonal i amabel ku e empleadonan ta dunando na tur hende. E guia ku e públiko ta haña na e dos puntonan di vakunashon ta hopi bon. Por sierto, esaki ta proba ku nos mes por i ku nos por ta hopi orguyoso di esaki.

Pero mientrastantu gobièrnu ta sigui monitòr e proseso pa hasi adaptashon kaminda ku ta nesesario, mehorá kaminda ku esei tin mester i drecha kaminda ku mester drecha tambe. Gobièrnu ta konsiente ku ainda tin sierto gruponan den komunidat ku tin difikultat pa registrá, pero e ta pidi su diskulpa pa esei, pero ku djis un tiki mas pasenshi esei lo drecha.

Segun Jesus-Leito, e ánimo bou di hendenan ta hopi grandi, aunke ainda tin un grupo ku ta duda den e vakuna. Segun e minister, na esnan ku ta duda e ke bisa: Por a mira den e aña ku a pasa kon nos tur aki na Kòrsou a pasa den e pandemia di COVID-19, i for di e punto di bista médiko e tabata un éksito.

Esnan ku ta dunando e kuido a proba ku nan sa kiko nan ta hasiendo i nos mester tin konfiansa den nan.