WILLEMSTAD.- Kuminsando otro siman gobièrnu ta bin ku maneho nobo pa entrada na nos pais. Aparte di PCR tèst tambe lo bai eksigí un tèst di Antigen, ta loke ku epidemiólogo dr. Izzy Gerstenbluth a duna di konosé.
Dr. Gerstenbluth a splika ku e kantidat di hende ku ta yega for di Hulanda a baha drástikamente i esaki ta un sla duru pa sektor di turismo. Djárason último dia 14 di aprel, KLM a baha ku 41 hende i ayera TUI a yega ku 34 hende for di Hulanda. Si nos a pensa di hasi algu, esaki a keda hasí pa nos kaba. Hende no ta biniendo Kòrsou pa motibu di loke ku ta pasando último simannan. I e tendensia di kantidat di hende ku ta yega riba buelonan di KLM òf TUI ta algu ku ta tumando lugá fo’i dia e kasonan a subi drástikamente i ku kantidat di morto pa dia.
Mas aleu e epidemiólogo a splika ku solamente e variante britániko a drenta nos pais i ta nos mes a plam’é.
E loke ku ta hasiendo pa protehá poblashon mas tantu kontra entrada dje vírus ta e PCR tèst ku ainda ta na vigor. E PCR tèst ta kalkulá ku 70% pa 80% di e riesgo ta keda bahá. Pero ku un variante nobo, ke subi e porsentahe di protekshon. Entrante otro siman lo introdusí un èkstra tèst. Esaki ta p’e di 3 dia ku e hende a yega Kòrsou. Lo bolbe tèst e hende ku drenta ku Antigen. E tèst di Antigen mester indiká si e persona ta infektá si òf nò. Por ehèmpel di a hasi PCR tèst riba e último dia ku a drenta Kòrsou, ta warda 3 dia, e tèst Antigeno mester ta kla. Si e hende ta infektá, e mester keda isolá. Esaki ta un èkstra medida ku ta bini kuné, i e Antigen ta obligatorio i lo keda di “link” ku e PCR tèst, i tambe mester keda pagá promé ku drenta Kòrsou.