WILLEMSTAD.- Minister di Salubridat, Medio Ambiente i Naturalesa Zita Jesus-Leito ayera durante konferensia di prensa di gobièrnu a duna di konosé ku lo habri posibilidat pa komunidat por registrá. Entrante djaluna dia 5 di aprel tur persona riba 18 aña ku ta deseá di risibí di vakuna kontra COVID-19 por registrá pa un sita. Registrashon ta posibel tantu ‘online’ via www.bakuna.cw òf telefónikamente via Helpdesk 9345. Gobièrnu a duna di konosé ku ‘esnan ku ta registrá kaba ‘online’ i no tabata bin na remarke, ta risibí un mail ku fecha pa nan sita’.

Tambe a duna di konosé ayera ku entrante djasabra 3 di aprel ta habri un lokalidat nobo pa vakuná den Sentro Komersial Sambil, entrada ‘Cas Abou’. Esaki ta nifiká ku entrante djasabra 3 di aprel, tur persona ku tin un sita pa bakuná na Sehos Poli mester akudí na Sambil riba e mesun fecha i orario di nan sita. Esnan ku tin un sita pa SEHOS Anna-Pav mester akudí na SEHOS Poli, tambe segun fecha i orario di nan sita.

Durante konferensia di prensa a duna di konosé ku den Sambil por vakuná entre 1000 i 1500 persona pa dia. Sambil no ta pidi niun depchi na gobièrnu pa nan por hasi uso di e lokalidat pa vakuná hende. Ku esaki Sambil ke duna un kontribushon na komunidat i yuda ku kombatimentu di COVID-19. Zita Jesus-Leito djamars último a splika durante konferensia di prensa ku nos komunidat ta pasando den momentunan hopi difísil komo konsekuensia di e kasonan positivo di COVID-19. Segun e minister demisionario situashon na nos hospital ta di preokupashon. Pa e motibu aki gobièrnu ke tuma tur e pasonan pa asina minimalisá e preokupashon. Tambe Kòrsou ta den kontakto ku ‘nos islanan hermano i ku Hulanda pa atendé ku e krísis na e manera mas mihó posibel.’ Minister a bisa ku ‘un di manera pa nos por sali for di e situashon aki ta pa vakuná i vakuná masalmente’. Pa e aki motibu gobièrnu a habri posibilidat pa tur hende di 18 aña bai ariba por registrá pa haña nan vakunashon.