WILLEMSTAD.- Ideal lo tabata pa e profeshonalnan di kuido i e aseguradónan di kuido yega na un akuerdo i konvenio di preis pa loke ta trata dunamentu di prestashon i kon e tarifanan relashoná ku esakinan ta formulá i konsistí.  Finalmente ta trata pa yega na un sistema di pago ku ta kuadra ku realidat di kuido den práktika.

Segun Guardian Group, mientrastantu e oumentonan drástiko di e tarifanan di Sehos ta den foko di notisia. Asina ta ku e gastunan pa drumi den hospital ta subi entrante 1e di aprel 2019 ku 85%. Aunke un oumento di e tarifanan ta hustifikabel, Guardian Group Fatum ta lamentá e oumento gigantesko akí.

Ademas ta kuestionabel si Sehos por oumentá e tarifanan akí. Por lo tantu Guardian ta di opinion ku – e tempu ei – e ordenansa insular di 2009 (AB 2009, no. 68) ku ta stipulá e gastunan pa drumi den hospital i e tarifanan adishonal di Sehos te ainda ta vigente. E areglo akí ta for di 10/10/10 i pues ta sigui ta bálido pa pais Kòrsou. Si Sehos ta haña nesesario pa oumentá su tarifanan e ora ei e areglo akí mester keda revoká promé segun e trayekto ku ta stipulá esaki. Guardian Group Fatum tambe lo notifiká Sehos ku e ta di opinion ku e oumento di tarifa akí, aworakí no ta realisabel.

Aparte di esaki, introdukshon di e seguro básiko entrante 1e di febrüari 2013 a kondusí ku kasi tur e personanan aspirante (hóben) ta sigurá a base di e seguro básiko di gobièrnu serka SVB i ku pa e motibu ei e aseguradónan partikular di gastunan di enfermedat na Kòrsou ta kubri solamente 10% di e merkado. P’esei e merkado pa e aseguradó partikular di gastunan di enfermedat kada be ta mas bou di preshon.

Entretantu e aseguradónan ta purba konhuntamente ya pa basta tempu di haña un kòmbersashon ku ministerio di Salubridat, Medio Ambiente & Naturalesa pa den konsulta ku gobièrnu yega na un solushon pa e situashon akí.

Por lo tantu lo ta posibel adaptá e lei pa asina no solamente SVB sino tambe e aseguradónan partikular por ofresé un pakete básiko pa e gastunan di enfermedat i ku tur hende por sera un seguro serka e aseguradónan akí. Asin’aki ta krea hopi posibilidat pa skohe pa e asegurado i por kompetí a base di servisio i kalidat. Manera efektivamente e sistema di kuido ta funshoná na Ulanda.

Ainda segun Guardian Group Fatum nan no a nota un posishon konkreto di gobièrnu enkuanto esaki.

Guardian Group ta sigui ku atenshon e desaroyonan di e seguro di gastunan di enfermedat na Kòrsou i ta spera riba un solushon satisfaktorio pa tur esnan envolví.