...un bista di pasaheronan ku ta kla pa subi bus ku mondkapjes bisti i tambe shofùrnan di bus...

WILLEMSTAD.- Ayera nos di EXTRA a tuma nota di vários hende para na parada di bùs ku mondkapjes na kara.
Último dianan dr. Gerstenbluth a pone énfasis riba bistimentu di mondkapjes den lugánan sera, spesialmente den transporte públiko, kaminda no por mantené distansia sosial, a konsehá pa bisti mondkapjes.
Den deklarashon ku sr. Giovannie Decaster presidente di sindikato STO den deklarashon pa EXTRA a konfirmá ku último dianan por mira un oumento drástiko di hendenan ku ta bisti mondkapjes na momentu ku ta bai subi bùs.
El a indiká ku e den e promé dianan ku a deskala, ta estranhero so tabata hasi uso di mondkapjes den bùs. Pero for di ayera el a ripara ku hopi hende ta usa mondkapjes. Mayoria ta mucha di skol. Segun Decaster, sigur entre 45 pa 50% di pasahero awor aki ta hasiendo uso di mondkapjes.
E presidente ta aploudí esei i ta spera ku mas hende ta bira konsiente i ku hendenan pa 100% ta hasi uso di e mondkapjes den transporte públiko.
Shofùrnan di bùs tambe ta hasi uso di mondkapjes, ounke tin algun shofùr ku ainda ta kore den èrko ku mondkapjes na man. Pero mas sigur ta pa kore sin èrko, glas bahá i ku mondkapjes.
Decaster ta kontentu ku awor hende a mira importansia di bisti mondkapjes.
Mirando kon gobièrnu pa medio di dr. Gerstenbluth a yuda ku mondkapjes, Decaster lo apresiá ku lo por yuda nan pa por haña mondkapjes pa ora kliente no tin, e shofùr por fasilitá nan unu den bùs. Decaster ta kere ku tur hende mester kuida nan mes i sòru pa tin mondkapjes bisti.
EXTRA a tuma nota di ABC Busbedrijf ku ta pidi tur usuario di konvoi pa usa un tapa boka, esta mondkapjes.