‘License fee’ ta generá 19 mion den kaha di gobièrnu, pero...

WILLEMSTAD.-Gobièrnu di Kòrsou ta konsiderando seriamente oumentu di e aktual ‘license fee’ di 1.0 pa 1.5%. Esei ta loke ta gastu di transakshon ku ta kobra na momentu di kumpra plaka ekstranhero i tambe na momentu di hasi transferensia di plaka di residente pa no residente den e union monetario entre Kòrsou i St. Maarten. For di e momentu ku a kuminsá ku trámitenan pa atendé seramentu di Giro Bank entre otro Banko Sentral di Kòrsou i St.Maarten a indiká ku Giro Bank tin un debe na e instituto pa trabounan i gastunan realisá. Kòrsou i St. Maarten ta forma parti di un union monetario i komo tal kualke medida òf desishon ku ta trata ‘license fee’ mester konta pa ámbos pais. Gobièrnu a pensa pa subi e ‘license fee’ ku 0.5% di manera ku por generá e fondonan nesesario pa kumpli ku e debe aki.

CBCS a hasi un investigashon basta profundo riba e materia aki. A studia e impakto makro ekonómiko na momentu ku oumento di e ‘license fee’ lo kousa pa tantu Kòrsou komo St. Maarten. ‘License fee’ a kuminsá na yanüari 1996 komo gastu di transakshon riba plaka ekstranhero. Tin dispensashon pa no paga ‘license fee’ i esei ta den kaso di bolbe invertí fondonan ku ta den eksterior, re-eksportashon serka kompanianan di Free-zone i na momentu ku Gobièrnu ta hasi pagonan den ekstranheria. Banko Sentral na final di kada aña ta paga na kada pais e montante ku el a generá ku ‘license fee’. Un bista den sifranan ku CBCS mes ta brinda ta indiká ku Kòrsou a risibi, den e periodo di 2011 pa 2019 entre 47 mion pa 52 mion florin pa aña. E promedio ta alrededor di 50 mion florin pa aña pa Kòrsou miéntras ku e promedio pa Sint Maarten ta alrededor di 25 mion florin pa aña den mesun periodo.

Sifranan ofisial di CBCS ta mustra ku e entradanan di ‘license fee’ a kai bastante di yanüari pa oktober 2020 i yega apénas 39 mion florin. Pa St. Maarten e kaida a yega te 18 mion florin. CBCS ta kalkulá ku un oumentu di ‘license fee’ lo nifiká oumentu di inflashon pa ámbos pais den e union monetario konsiderando ku ámbos ta dependé hopi di importashon. Un inflashon mas haltu lo nifiká e.o redukshon den e forsa di kompra. Un posibel oumentu di ‘license fee’ lo tin efekto negativo riba eksportashon kual tin su efekto riba turismo.

Di otro banda por spera ku un oumentu di e ‘license fee’ lo generá pa Kòrsou 19.7 mion i pa St.Maarten 9.2 mion florin.  Mas detaye den edishon di EXTRA.