WILLEMSTAD.- Den kaya Jan H. Fergusonstraat tin un situashon a-higiéniko. E habitantenan a duna di konosé na EXTRA ku den siman tras di lomba tapa di un kloaka a habri, ku e konsekuensia ku awa shushi di fekalia ta kore den e kaya i tambe drenta den kurá di algun habitante. Aparte di e holó desagradabel ku esaki ta produsí, por a tuma nota ku tin asta bichi den e awa aki. Bisiñanan a duna di konosé ku nan tin vários dia ta yama e instansianan konserní, pero sin e resultado deseá. Por bisa ku nan no ta ni logra drenta den kontakto ku e instansianan p’asina splika nan di e situashon. Un supliká ta bai na e instansianan konserní pa porfabor tuma akshon mas pronto ku ta posibel i aliviá e habitantenan.