WILLEMSTAD.- Ayera djabièrnè un biaha mas a keda demostrá ku e sistema pa awa sigui kore bai “laman” no ta funshoná na Kòrsou. Barionan manera Brievengat, Bonam, Jong Bloed, Van Engelen tabata bou di awa, ora un ola tropikal no muchu grandi a pasa riba parti di Kòrsou. E fotonan ku nos tin awa ta papia palabra kla. Por mira e kaya di Ronde Klip pasa dilanti di Festival Center, por mira Van Engelen banda di Dierentuin ku atrobe a konfrontá molèster formal di awa.

Servisio Meteorológiko ta informá;
Un disturbio riba parti sentral di Área di Karibe durante próksimo 24 ora lo sigui kousa un oumento temporal di nubia riba nos region. Algun di e nubianan aki lo sigui generá de bes en kuando lokalmente áwaseru riba Kòrsou. Un par di e yobidanan aki lo ta fuerte i kompañá pa welek ku bos. E áwaseru fuerte lo kousa sierto molèster na e lugánan di kustumber. Sinembargo e sistema aki a pasa bastante kaba i e aviso pa prekoushon di Mal Tempu a keda kansela.

Kantidat di awa ku a kai; Van Engelen, 97,6 mm,Seru Kokori, 32,2 mm, Biesheuvel, 25,3 mm, Steenrijk, 20,2 mm, Seru Mahuma, 16,7 mm, Hato 14,7 mm en Santa Maria, 14,0 mm.