Kaya Hubert M. Schoop 

WILLEMSTAD. - Nèt un luna pasá EXTRA a dediká atenshon na e situashon peligroso ku tin den Kaya Hubert M. Schoop den e bario di Sapaté. E dia ei abitantenan ta di opinion ku no mester warda baka hoga na pos, pa despues hasi algu, pa motibu ku abitantenan di entre otro Kaya Hubert M. Schoop ta sumamente preokupá pa e velosidat haltu ku outomobilistanan ta pasa den e kayanan aki.

Ayera klaramente pa motibunan di velosidat haltu un outo lo mester a sali for di bògt i dal den tres outo ku tabata stashoná dilanti e apartamentunan ku tin den e kaya aki, esaki ta loke ku abitantenan di e kaya a splika EXTRA.

...Esaki ta e kaya ku anteriormente EXTRA a publiká, ku ta un kaya ku outonan ta pasa ku velosidat haltu...

Ta trata di kayanan ku ta krusa den e bario di Sapaté ku ta un bario relativamente nobo, kaminda ku tin hopi famia hóben ku yu ta biba. Un bario kaminda ku tráfiko mester move slou pa motibu ku tin hopi mucha lantando den e bario i semper un mucha por kore sali kurá di kas.

E peliger no ta solamente pa muchanan ku lo por subi kaya, sin paga tinu, pero tambe pa outonan ku ta sali na  kurá di kas, ta haña sorpresa tur dia di nobo ku ora ku nan sali nan kurá di kas, ya tin un outo riba nan, miéntras e kaya tabata ketu pa nan sali nan kurá di kas.

P’esei abitantenan di e bario aki a ekspresá nan preokupashon pa ku e situashon i ta pidi outoridatnan konserní pa tuma medidanan pa baha e velosidat prinsipalmente den e kaya ya menshoná ku tur dia di nobo ta un peliger pa e abitantenan.

Abitantenan ta pidi pa pone drèmpel pa baha e velosidat, pa motibu ku ta kaya stret ku ta duna e outomobilista e posibilidat di subi su velosidat te na un nivel iresponsabel.

E aksidente di ayera a keda limitá te na daño material, pero meskos por t’asina ku tabatin mucha dilanti nan kas ku tur e konsekuensia ku esaki por a trese kuné.

Ironia ta ku e kayanan tin palu di lus, pero ya pa 3 aña e lusnan no ta sende.

....Skuridat total den e kayanan aki ya pa tres aña...