WILLEMSTAD.- Kontinuando ku investigashon relashoná ku kasonan di robo kometé resientemente, e mesun tim ku ta enkargá ku investigashon di kasonan di kiebro den kas i negoshi den e área pariba di Kòrsou, a tene un otro entrada hudisial den Seru Grandi.

Ayera alrededor di kuartu pasá di seis di mainta, e tim aki a tene un entrada hudisial na un kas na Seru Grandi i akinan a konfiská un arma di kandela, munishon i un outo ku ta wòrdu usá pa kometé ladronisia kuné. Na e adrès en kuestion a detené e hòmber sospechoso C.C.P. di 24 aña di edat nasé na Kòrsou.

A presentá e hòmber sospechoso aki tambe dilanti di un fiskal ouksiliar ku a ordená nan enkarselamentu pendiente di mas investigashon.