WILLEMSTAD. - Djabièrnè 20 di sèptèmber i djasabra 21 di sèptèmber, awor e di 12 edishon di “World Clean Up Day” (Dia Mundial di Limpiesa) ta ranka sali, kaminda Kòrsou huntu ku 191 pais mas ta limpia nan pais, for di 7 or pa 11 or di mainta di Bándariba te Bándabou.

Preparashon pa e akshon boluntario mas grandi na mundu aki, ta yegando su kulminashon. Djasabra último kordinadónan di áreanan a risibí e delaster detayenan i mayoria lider di grupo/partisipante a risibí nan pakete pa e trabounan di limpiesa.

Mañan djárason 18 i djaweps 19 sèptèmber, lidernan ku NO a tuma pakete ainda, por pasa di 5 or pa 7 or atardi na SAMBIL na e lokalidat di Sea Turtle Conservation Curaçao (entrada di Carrefour).

Ademas Curaçao Clean Up ta rekordá tur outomobilista pa tene kuenta ku djasabra awor tin boluntario na diferente parti di Kòrsou ta hasiendo trabou di limpiesa. Por fabor baha e velosidat den e áreanan kaminda tin trabounan di limpiesa ta tumando lugá. Lo tin e indikashonnan nesesario unda tin trabounan ta tuma lugá i tambe lo tin boluntario ku chaleko oraño bistí.

Un rekordatorio pa boluntarionan, kome bon promé sali kas, bisti kómodo, usa krema kontra solo, bisti pèchi i bebe hopi awa durante e mainta (kada 20 minüt). Rode Kruis tambe ta pendiente pa kualke urgensia.

Curaçao Clean Up ta gradisí tur boluntario, spònser i prensa ku ta partisipá na e akshon di limpiesa nashonal aki i ku tur aña ta koperá pa hasi e akshon mas grandi di limpiesa di Kòrsou un éksito. Mesora tambe ta hasi e evento di limpiesa mundial aki un evento sosial.

Komunidat ta komprondé importansia di un isla limpi ku ta bon pa kada hende su mes salú, pero tambe pa progreso di nos pais.

Pa mas informashon por mail worldcleanupdaycuracao@gmail.com òf por yama tel.5266396.