WILLEMSTAD.- Manera ya ta konosí, ayera e hòmber di inisial H.R. sospechá di a tira su eks pareha mata dilanti di algun mucha menor a keda presentá dilanti hues komisario.

Mesora su detenshon a keda prolongá ku 8 dia mas. Despues ku su detenshon a keda prolongá, el a keda hiba na Sentro di Detenshon i Korekshon Kòrsou pa asina sinta su dianan. Anteriormente na momentu ku el a keda detené, a enkarsel’é na e sèlnan na warda di polis Barber.

Pero tur kos a kue un otro rumbo na momentu ku a yega ku e sospechoso na prizòn ayera mainta despues ku su detenshon a keda prolongá. Na su yegada, a hib’é na blòk 1 kual ta e blòk kaminda ta sera e detenidonan ku resien a yega prizòn. E blòk aki ta ser yamá “Politiecellen”. Na su yegada mesora el a keda ataká i asta menasá ku morto pa diferente detenido.

Remarkabel ta ku den prizòn ta será tambe eks pareha di e dama Dayanira Eisden kual e sospechoso a asesiná. E promé eks di Dayanira ta tata di e promé yu (Dayanira tin 3 yu) i a keda detené resientemente pa Violashon Lei di Arma.

Pues lo por bin un konfrontashon entre e dos hòmbernan aki mirando ku e sospechoso H.R. a asesiná mama di e yu hòmber di e otro sospechoso. Pa su seguridat, mesora a hiba e sospechoso H.R. pa e departamento di FOBA kaminda a enkarsel’é i kaminda tin èkstra seguridat pe.

For di fuentenan EXTRA a komprondé tambe ku e sospechoso tin un aktitut masha normal i trankil manera nada no a pasa.