WILLEMSTAD – Awe mainta outoridatnan mester a bai na un kas di kuido, Kas Genesis pa un situashon sumamente tristu. Staf di e kas di kuido a bati alarma na momentu ku un beibi lo no tabata duna señal di bida mas. Luis Curiel, bosero polisial a konfirmá ku bèrdat un situashon hopi lamentabel ku a presentá awe mainta ora ku dokter na e kas di kuido a pidi pa dokter di polis bin na e sitio ya ku e beibi no tabata duna señal di bida mas. Tantu un patólogo komo Dr. Maduro a yega i a nota ku ta trata di un beibi resien nasi pero pa 8:25 a konstatá morto. Den konsulta ku fiskal i Ministerio Públiko a opta pa tuma e kurpa den beslag pa hasi e investigashon i determiná e kousa pakiko e yu a fayesé. “No tabatin ningun indikashon di un krímen ku lo a tuma lugá pero mester determiná den kasonan asina aki pa muchanan menor di edat kiko ta e kousa di morto. Esei ta e investigashon ku ta bai tuma lugá awor aki,” asina bosero Luis Curiel a finalisá bisando. Kas Genesis ta forma parti di Fundashon Kalor. Ta un kas di kuido pa hóbennan ku ta sali na estado òf ku a kaba di duna lus. E baby ku a fayesé awe tabatin dos luna di bida.