WILLEMSTAD - Awe e tim di MEO huntu ku representantenan di Aqualectra a hasi un bishita di sorpresa na Boca Simon den Penstraat. Na yegada a bin konstatá basta iregularidat na e sitio aki. A bin topa ku e establesimentu tabata hòrta di koriente. Ademas tabatin basta outo bieu ku tabata krea un situashon inakseptabel. Aparentemente a atvertié den pasado kaba ku mester kita e outonan aki for di e sitio pero te awe nada no a pasa. Asta bòrchi di Gobièrnu tin na e sitio aki unda ta pone bon kla ku mester tin akseso liber pues no ta tereno priva. Presensia di e outonan bieu aki no tabata bon situashon pa esnan ku ta bishita e área. Pues tabata un bon oportunidat pa hasi un limpiesa grandi mesora na e pida playa aki.  A manda e sobránan di outo bai ‘crush’ mesora. Esnan konserní di Aqualectra a deskonektá e koriente ilegal. Outoridatnan mesora a tuma e desishon pa para tur práktika na e sitio i a buta steker riba e kònteiner kaminda un skol di buseo tabata operá, serando esaki.