WILLEMSTAD. - Un artíkulo ku a keda publiká siman pasá den e korant ‘Stabroek News’ di Guyana, Direktor Interino di “State Assets Recovery Agency” (SARA) Aubrey Heath-Retemyer, a duna di konosé ku esfuersonan ta keda hasí pa verifiká un rapòrt di e oronan ku a keda robá for di riba Summer Bliss, lo a keda rekuperá i ta den poder di Gobièrnu di Kòrsou.

E direktor interino a splika ku e loke ku nan ta hasiendo ta buska mas informashon posibel promé ku nan aserká Gobièrnu di Kòrsou.

Manera ta konosí dia 30 di novèmber 2012 tabatin un robo mionario ku a tuma lugá riba e boto piskadó di Guyana Summer Bliss. E dia ei a roba mas o ménos 70 bara di oro ku un balor di riba 11 mion dòler.

Outoridatnan guyanes ta ‘claim’ ku e oro ta di nan i ku tin basta tempu kaba tin kontrabanda di oro ku ta sali Guyana pa Miami.

Den e kaso aki e boto Summer Bliss ku tabata rumbo pa Miami a hasi un stòp na Kòrsou, kaminda ku hòmbernan ku ‘jacket’ di polis bistí a drenta den e boto i a bai stret na e oronan i disparsé.

Awor aki ya ta kasi 7 aña pasá ku e robo a tuma lugá, pero riba un base regular outoridatnan di SARA ta risibí informashon di e oro aki.

E loke ku nan ta hasiendo awor aki ta pone tur e informashonnan ku nan ta hañando huntu pa aserká Gobièrnu di Kòrsou ku esaki.

Na opinion di direktor di SARA, nan ta kere ku nan tin derecho di hasi esaki, pa motibu ku e oro ta di Guyana i nan ke verifiká e informashonnan ku nan ta haña.

Mester indiká ku for di luna di òktober di aña 2013 ku a wanta e kaso penal di robo bara di oro for di riba e barku Summer Bliss, e investigashon a keda ‘status quo’.

Manera ta konosí dia 18 di òktober di aña 2013, korte a suspendé e kaso di tur e sospechosonan pa tendementu testigu i a laga tur hende den libertat pendiente nan tratamentu. Esaki a pone ku e kaso a bai pa tratamentu te den luna di mei 2014.

E tempu ei Fiskal a pidi e tempu largu aki pa logra yega na e pruebanan konvisente, pero manera e investigashon a kana, ta parse ku no por logra pruebanan.

Un di e motibunan ku ta hasi e investigashon kompliká i ku ta pone e kaso warda hopi, ta e echo ku mester pidi asistensia hurídiko den eksterior pa tende e kapitan i tres tripulante di e barku Summer Bliss ku tabatin e baranan di oro ku a keda hòrtá na bordo.

Dia di e tratamentu hues a pidi fiskal pa mas tantu posibel entregá defensa tur dokumentu ku tin na tempu, pa no warda te lat pa entregá esakinan.

Pero te ku e dia dia di awe, no tin nada mas di e kaso Summer Bliss, miéntras outoridatnan Guyanes si ta di opinion ku outoridatnan o sea gobièrnu di Kòrsou tin e oronan, asina a keda publiká den e korant ‘Stabroek News’.

Artíkulo publiká den ‘Stabroek News’ siman pasá