WILLEMSTAD.- Entrante 1e di òktober próksimo Hulanda lo terminá e programa di supsidio pa paketenan di kuminda na Kòrsou, Aruba i St. Maarten. Esei ta loke Sekretario di Estado sr. Raymond Knops a duna di konosé ayera den un karta na 2de Kamer. Pero e paisnan a ser informá na tempu dje desishon aki, segun e mandatario.
T’asina ku for di mei 2020 Den Haag a pone 85.4 mion euro disponibel pa e paisnan pa por dediká na paketenan di kuminda pa habitantenan ku dor di COVID-19 a bin keda sin entrada. Pero awor ku e nesesidat agudo no ta eksistí mas, e responsabilidat ta bèk seka e paisnan segun Knops.
Segun Knops, habitantenan di islanan-CAS tin di haber ku retonan grandi for di e brote di COVID i tambe nan turismo ku a kai afó. Komo konsekuensia dje pandemia tin hopi hende ku a bin kai den pobresa. I pa e motibunan ei for di mei 2020 Hulanda a pone e medionan disponibel pa kumpra kuminda. Esnan ku pa motibu di COVID a ser afektá mas tantu por a ser yudá ku esaki den nan nesesidat.
Riba petishon di Hulanda, Krus Kòrá dje diferente islanan a start ku e programa di pakete di kuminda na mei 2020. Ehekushon di e programa aki ku tabata den koperashon ku partnernan lokal tambe tabata dirigí riba ayudo agudo i no tabata intenshoná pa e keda eksistí. I pa e motibu ei na prinsipio di aña a yega na palabrashon ku e paisnan riba e transishon dje programa ku tin di bai pa e gobièrnunan lokal mes i tambe ku lo baha e sosten finansiero tambe.