WILLEMSTAD.- E union monetario di Kòrsou i Sint Maarten a sigui den 2023 riba e ruta di rekuperashon ekonómiko, ounke e ritmo di kresementu tabata ménos rápido kompará ku 2022. Asina presidente di Banko Sentral di Kòrsou i St. Maarten (CBCS), Richard Doornbosch a trese dilanti ayera durante presentashon di e boletin ekonómiko di desèmber 2023.

Segun kalkulashonnan mas resien di CBCS kresementu ekonómiko di Kòrsou na 2023 lo yega 4,1 porshento. Esaki ta ménos ku e kresementu di 7,9 porshento na 2022, pero segun Doornbosch e kresementu den 2023  ainda ta un desaroyo positivo. Pa 2024 ta pronostiká un kresementu di 4,4 porshento loke ta trese Kòrsou bèk na e nivel promé ku e pandemia di covid. Esei ta mas lihé ku loke a premirá anteriormente.”

Despues, esta pa 2025 i añanan siguiente ta pronostiká ku e kresementu ekonómiko lo nivelá i yega na 2026/2027 na un promedio di 1,7 porshento pa aña. E kresementu ekonómiko di Kòrsou segun Doornbosch ta prinsipalmente okashoná pa e sektor turístiko ku a sigui krese. Ta bai aki pa e turismo di estadia. Sifranan di Kòrsou ta mas haltu ku e promedio di region. Turismo krusero si a mira un bahada den 2023 siendo ku na 2022 esaki tabata kresiendo ainda.

Na Sint Maarten, e ritmo di kresementu a eksperensiá un bahada mas konsiderabel ku na Kòrsou, esta di 9,8 porshento na 2022 pa 3,8 porshento na 2023. “Tur dos pais a mira nan ekonomia krese, apesar di e desafionan di e ambiente eksterno, manera e efektonan di largu plaso di e pandemia, e reperkushonnan di e guera na Ukrania, e oumento di tenshon geo-polítiko, e efektonan indirekto di maneho monetario mas estrikto pa kombatí inflashon, i kondishon ekstremo di tempu,” Doornbosch a deklará.

Mas aleu e presidente di CBCS a bisa ku ta mira klaramente tambe ku e sifra di inflashon ta bahando. E inflashon na Kòrsou a yega 7,4 porshento na 2022 i pa desèmber 2023 e sifra di inflashon lo yega 3,3 porshento. Apesar ku inflashon ta baha hendenan no ta sinti esaki ainda den nan forsa di kompra pasobra ounke ménos, tin inflashon ainda pues preisnan ta sigui subi. Prinsipalmente esnan ku no ta haña indeksashon di salario ta sinti esaki den nan saku.

E sifra di desempleo na Kòrsou pa fin di 2023 lo ta alrededor di 10 porshento. Si den 2024 e kresementu ekonómiko kontinuá esaki por asta bou di 10 porshento. Pa Kòrsou esaki lo ta algu signifikante, ounke ku e ta haltu ainda kompará ku situashonnan normal.

Loke tambe CBCS a konstatá ta ku den 2023 entradanan di impuesto a sigui subi, pero ku gastunan di gobièrnu tambe a sigui subi. Konsekuentemente 2023 tambe lo kaba ku un surplus riba presupuesto, pero ménos kompará ku 2022. E surplus aki lo sigui baha den 2024 si e patronchi di oumento di gastu di gobièrnu sigui mesun kos. Pa e motibu aki Doornbosch ta atvertí tambe pa gobièrnu tene su gastunan bou di kontròl.