WILLEMSTAD. - Korte di Rotterdam ta dikta sentensia den un kaso remarkabel. Esaki pa motibu ku Korte ta haña e yu di Kòrsou kulpabel, pero finalmente Korte no ta imponé kastigu. Esaki pa motibu ku e kaso a tarda mas di 6 aña pa keda tratá den korte.

Dia 9 di mart último Korte di Rotterdam a trata e kaso kaminda ku un hòmber yu di Kòrsou a trata di hiba un hòmber di Somalia Inglatera, loke ku ta keda konsiderá trafikashon di hende.

E akusado a keda aserká pa un otro hòmber ku a ofresé 500 euro, pa e hiba e hòmber Inglatera.

E yu di Kòrsou a tuma e dil i a bai ku e hòmber di Somalia. Nan ta subi Ferry na Hoek van Holland den su outo pa di un forma no riparabel hasi posibel pa e hòmber di Somalia drenta Inglatera.

Ora ku nan a yega Inglatera, a resultá ku e dokumentunan ku e hòmber di Somalia tabatin den su poder, tur tabata falsu i esaki a pone ku a hòmber bèk, miéntras e yu di Kòrsou mester a akudí na polis pa despues persiguí.

Pero e kaso a dura algu mas di 6 aña pa keda tratá den korte, loke ku e hues na Rotterdam ta konsiderá un término no rasonabel. Un término rasonabel pa trata un kaso no ta mas ku 2 aña.

Fiskal a persistí den su demanda i a pidi un kastigu di 120 ora di trabou ma 60 dia detenshon.

Hues den su motivashon a duna di konosé ku ròl di e akusado tabata esensial pa logra e hòmber den Inglatera, loke ku ta trafikashon di hende.

Hues den su desishon a splika, ku e ta haña e hòmber kulpabel pa su embolbimentu  den trafikashon di hende. Pero e echo ku e kaso a dura 6 aña promé ku tin un kondena, ta pone ku e akusado a biba momentunan ku hopi tenshon i esaki tampoko ta hustu.

Hues ta konkluí su desishon i ta enfatisá ku e yu di Kòrsou ta kulpabel, pero lo no imponé kastigu