KRALENDIJK – Entrante 1 di yüni biaheronan ku ta ful bakuná ku ta biaha di Aruba i Kòrsou pa Boneiru, no mester hasi e tèst di PCR mas. Aruba i Kòrsou ta evaluando si nan tambe ta introdusí e regla akí pa personanan di Boneiru ku ta biaha pa e islanan ruman. Asina gezaghebber Edison Rijna a trese dilanti den e konferensia di prensa ayera mainta. Segun e mandatario, Eerste Kamer na Hulanda a aprobá djamars último un lei ku ta hasi posibel pa hasi distinshon den e maneho pa hende ku ta ful bakuná i hende ku no ta ful bakuná.

Esaki ta pone ku por hasi e distinshon akí tambe ora hende ta biaha bini Boneiru. A base di e lei ei, Boneiru awor ta hasi un distinshon ora hende ta biaha di Aruba i Kòrsou pa Boneiru. Entrante promé di yüni un hende ku ta biaha di Aruba i Kòrsou pa Boneiru no tin mester di hasi tèst si e ta ful bakuná. Un hende ta ful bakuná si el a pasa e di promé i e di dos angua, i si el a pasa e di dos angua mas ku dos siman pasá.