WILLEMSTAD. - Despues ku a saka e ganadónan di e kampaña ‘Back to school 2025’ di Hucor Holding di e restorantnan KFC, Pizza Hut i Subway, ayera a hasi entrega di premio na e felis ganadónan. Esaki a tuma lugá na Pizza Hut Saliña.

Pa di tres 3 aña konsekutivo Hucor Holding ta tene e kampaña aki den e periodo di fakansi grandi.  E kampaña a start 10 di yüli i a finalisá dia 18 di ougùstùs.

Pa por partisipá na e kampaña e kliente mester kumpli ku algun eksigensia manera, e kompra mester ta mas ku 20 florin na un di e restorantnan KFC, Pizza Hut i Subway i despues di yena informashonnan patras di e resibu , e kliente por partisipá na e kampaña.

E informashonnan tabata: nòmber i fam di e yu i tambe di un mayor, number di telefòn selular òf telefòn fiho di e mayor. Mester yena tambe e edat di hóben ku ta entre 5 pa 21 aña.

Kada mucha ku gana a haña un pakete ku 11 premio. Ta trata di premionan manera un karchi di miembresia di Biblioteka Nashonal di Kòrsou pa di e forma akí stimulá lesamentu bou di e hóbennan. Tambe premio di e demas spònsernan manera Diadora, Optica Omni i tambe Omni.

Ayera 19 di ougùstùs a saka 6 ganadó, 2 di parti KFC, 2 di parti Pizza Hut i 2 di parti Subway. Riba e kombinashon di potrèt por haña un bista di e karanan kontentu di e muchanan.